Познатата галерија „Аполон“ во музејот „Лувр“ во Париз повторно се отвори за посетители, девет месеци по спектакуларниот грабеж на кралскиот накит во вредност од 102 милиони долари, кој откри сериозни безбедносни пропусти во најпосетуваниот музеј во светот. Посетителите повторно можат да ја видат раскошно украсената галерија од 17 век, една од најпознатите историски простории на „Лувр“, но скапоцените камења повеќе не се изложени на истото место.
Директорот на музејот, Кристоф Лерибо, изјави дека во иднина кралскиот накит ќе биде изложен на друга локација во рамките на музејот, со значително построги безбедносни мерки. Француската министерка за култура Катрин Пегард го нарече повторното отворање на галеријата „симбол на нов почеток“, по она што таа го нарече „траума за целиот свет“ и најави дополнително зајакнување на безбедноста во музеите низ Франција.
Грабежот се случи минатиот октомври среде бел ден. Двајцата крадци паркирале подвижна платформа пред „Лувр“, која ја искористиле за да се искачат до прозорецот на вториот кат, го скршиле стаклото, ги отвориле витрините со аголни брусилки и избегале со скутери управувани од двајца помагачи. Целата акција траела помалку од седум минути. Четири лица осомничени за директно учество во грабежот во меѓувреме се обвинети и се во притвор. Поголемиот дел од украдените скапоцени камења сè уште не се пронајдени. Единствениот вратен предмет е круната на царицата Евгенија, сопруга на Наполеон Трети, која беше пронајдена оштетена во близината на музејот и моментално се реставрира.
По грабежот, Лоренс де Кар поднесе оставка од функцијата директор на „Лувр“, соочувајќи се со остри критики за безбедносни пропусти и незадоволство од вработените. Државните ревизори и други критичари предупредија дека музејот недоволно инвестирал во безбедноста и одржувањето на инфраструктурата, а во исто време трошел многу за нови набавки на уметнички дела и проекти, особено во периодот по пандемијата.
