- Фудбалери од првенството на Англија се меѓу водечките стрелци, најдобрите асистенти, голманите со најмногу мечеви без примен гол…
Играчи од 75 различни домашни фудбалски дивизии досега настапија на Светското првенство (СП) годинава. Но во однос на влијанието врз турнирот, ниедна дивизија не може да се натпреварува со Премиер-лигата, пишува „Би-би-си“. Вкупно 154 играчи што ја завршија сезоната 2025/2026 во клубови од Премиер-лигата беа во составите за турнирот, многу повеќе отколку од која било друга домашна лига. Тие досега одиграа повеќе од 500 натпревари на СП 2026 заедно, играјќи само малку помалку од 40.000 минути вкупно.
Трката за „Златната копачка“ е класика на сите времиња, со некои од најголемите ѕвезди што се натпреваруваат на врвот на листата. И тие се убаво поделени и во различни домашни дивизии, со моментниот лидер Лионел Меси, кој ја претставува фудбалската лига на САД, Килијан Мбапе, кој игра во шпанската Ла лига, Ерлинг Холанд од англиската Премиер-лига и Хари Кејн од Бундеслигата на Германија. Но, генерално, играчите од Премиер-лигата постигнаа нешто помалку од двојно повеќе од следната лига со најмногу голови, Ла лига, пишува „Би-би-си“.
Вкупната бројка од 67 гола постигнати од играчи од Премиер-лигата е резултат на ефикасноста на Каи Хаверц од Арсенал (три гола за Германија), Исмаила Сар од Кристал Палас (четири за Сенегал), Коди Гакпо од Ливерпул (три за Холандија), Матеус Куња од Манчестер Јунајтед (три за Бразил), Јоане Виса од Њукасл (три за ДР Конго), Брајан Броби од Сандерленд (три за Холандија)… Вкупно 17 играчи од Премиер-лигата постигнале најмалку два гола на СП 2026. Во Ла лига има некои од најдобрите играчи во светот, а Џуд Белингам од Англија, Винисиус Џуниор од Бразил и Микел Ојарзабал од Шпанија постигнаа по четири гола. Само Кејн, Дениз Ундав од Германија, Јохан Манзамби од Швајцарија и Малик Тилман од САД постигнале повеќе од еден гол и играат во Бундеслигата, пишува „Би-би-си“.
Досега, девет играчи имаат три или повеќе асистенции, а пет од нив играат во Премиер-лигата. Вкупно, играчите од Премиер-лигата имаат придонесено повеќе од двојно повеќе од бројот на асистенции од фудбалери од Бундеслигата, која е втора на табелата, пишува „Би-би-си“.
И трката за мечеви без примен гол е тесна, но Премиер-лигата е на исто ниво. Иако 12 беа избрани за СП, само четири голмани од Премиер-лигата беа редовни стартери на СП 2026, но сите играа доволно добро за да обезбедат дивизијата да се рангира највисоко и за категоријата меч без примен гол. Џордан Пикфорд од Евертон ја зачува мрежата двапати, а Емилијано Мартинез од Астон вила и Алисон од Ливерпул го израмнија тој број за Аргентина, односно за Бразил. Холанѓанецот Барт Вербруген, единствениот друг голман од прв избор од Премиер-лигата, имаше еден таков меч за Холандија. Израмнета со Премиер-лигата е мексиканската Лига, благодарение на трите меча на мексиканскиот голман Раул Рангел и четирите на Камило Варгас на Колумбија. Ла лига има само еден помалку, но вкупниот број шест му припаѓа целосно на Унаи Симон од Атлетик Билбао, пишува „Би-би-си“. Н.М.
