Министерот за одбрана, Владо Мисајловски, денеска од седиштето на НАТО во Брисел изјави дека на состанокот на Северноатлантскиот совет со колегите министри разговарале за клучните предизвици во наредниот период, со посебен акцент на одбранбените буџети и постигнувањето на целта од 3,5 проценти од БДП.
– Главната тема беше буџетот и колку ќе се издвојуваат средства во наредните 10 години. Ова претставува основа за самитот што следи во Анкара – изјави Мисајловски.
Тој посочи дека нашата земја во моментов издвојува 2,18 проценти од буџетот за одбрана, што, како што нагласи, е значителен износ. Воедно, информира дека над 32 проценти од средствата се насочени директно во модернизација на Армијата.
– Она што се бара од нас е во наредните години да стигнеме до 3,5 проценти, со фокус на развојот на способностите и модернизацијата – рече Мисајловски, додавајќи дека ќе се продолжи со уште поголем интензитет на инвестиции.
Министерот оцени дека сите земји-членки се соочуваат со слични предизвици, особено во обезбедувањето континуиран раст на буџетите, но потенцираше дека со заеднички и солидарен пристап може да се реализираат заеднички проекти.
Како дополнителен позитивен фактор, тој ги истакна инвестициите во инфраструктурните проекти, посочувајќи дека Коридорите 8 и 10 имаат значење и како НАТО-коридори.
На маргините на состанокот министерот остварил билатерални разговори со повеќе колеги, меѓу кои и со грчкиот министер за национална одбрана, Николаос Дендијас. На средбата, како што информираат од Министерството за одбрана, била истакната заедничката стратешка определба за стабилен регион и силна колективна одбрана, како и значењето на континуираната одбранбена соработка.
