Иран и САД во петок ќе одржат нова рунда разговори во Швајцарија со цел постигнување конечен договор, откако претходно беше усогласен привремен меморандум меѓу двете земји, соопшти иранскиот министер за надворешни работи Абас Арагчи.
Во изјава за иранската државна телевизија, Арагчи нагласи дека претстојните преговори ќе бидат насочени кон финализирање на договорот и надминување на преостанатите несогласувања меѓу Техеран и Вашингтон, пренесе „Ројтерс“.
Тој истовремено испрати предупредување дека секој евентуален израелски напад врз Либан, како и долгорочно присуство на израелски сили на либанска територија, Иран ќе го смета за нарушување на постигнатиот привремен договор со САД.
– Од наша перспектива, на едната страна од овој меморандум се САД и Израел, а на другата Иран и Хезболах – изјави Арагчи.
Според него, разговорите во Швајцарија претставуваат важен чекор во обидите за постигнување трајно решение и регулирање на преостанатите отворени прашања меѓу двете страни, пренесе „Анадолија“.
Новата рунда преговори доаѓа во период на зголемени тензии на Блискиот Исток, додека меѓународната заедница внимателно ги следи напорите за намалување на ризикот од поширока регионална ескалација.
