- Ерлинг Холанд, фудбалската суперѕвезда на Манчестер сити, има амбициозни планови да придонесе за шахот да го направи поширок и попријателски спорт за гледачите. Тој инвестира во „Норвешкиот шах“ и во неговиот нов формат на натпреварување, Светската турнеја во тотален шах
Фудбалската суперѕвезда на Манчестер сити, Ерлинг Холанд, инвестира во „Норвешкиот шах“ и неговиот нов формат на натпреварување, Светската турнеја во тотален шах. Холанд има амбициозни планови да придонесе за шахот да го направи поширок и попријателски спорт за гледачите. „Норвешкиот шах“ со години е движечка сила за иновации во шахот и сега прави уште еден голем чекор со лансирање на оваа Турнеја.
– Шахот е неверојатна игра. Го изострува вашиот ум и има јасни сличности со фудбалот. Мора брзо да размислувате, да им верувате на своите инстинкти и да размислувате неколку чекори однапред. Стратегијата и планирањето се сѐ. Инвестирам во „Норвешкиот шах“ затоа што верувам дека новата турнеја во тотален шах може да го претвори шахот во уште поголем спорт за гледачите низ целиот свет. Тимот зад „Норвешкиот шах“ веќе направи импресивна работа во развојот на настанот, а приклучувањето кон проектот беше премногу возбудливо за да се пропушти – вели Холанд, пренесе Светската шаховска федерација (ФИДЕ).
Глобалната фудбалска суперѕвезда, заедно со норвешкиот бизнис-лидер Мортен Борге, ја основа компанијата „Шаховски другари“, која ќе биде значаен сопственик на „Норвешкиот шах“.
– Шахот е стратегија и долгорочно размислување. Тоа се квалитети што ги дефинираат и елитниот спорт и способноста за правење разумни инвестиции со текот на времето. На многу начини, шахот е токму на крстопатот на световите од кои доаѓаме јас и Ерлинг. Дури и ветив дека ќе му дадам на Ерлинг малку шаховски тренинг – вели Борге.
Со милиони вљубеници низ целиот свет, Холанд е веќе глобална спортска икона и природен партнер што ќе помогне во растот на новата публика и ќе внесе свежа енергија во играта.
Се очекува новото првенство, на кое ќе учествуваат најдобрите светски играчи, да стане едно од најзначајните случувања во модерниот шах. Турнејата во тотален шах ќе се состои од четири турнири секоја година и ќе круниса комбиниран светски шампион во три дисциплини, брз класичен шах (45 минути плус 30 секунди по секој потег, и ќе се добива класичен рејтинг), што е иновација на класичниот шах со пократко временско ограничување, потоа забрзан и брз шах. Ова ново СП е одобрено од ФИДЕ за најмалку 16 години.
– Шахот, како и фудбалот, отсекогаш бил глобален јазик на стратегија и креативност. Гледањето спортист од светска класа како Холанд како се приклучува на ова СП е моќен сигнал за глобалното внимание и културната релевантност што шахот ја ужива денес. Како претседател на ФИДЕ, отсекогаш ми била амбиција да го изградам шахот во одржлив и привлечен глобален спорт. Во тесна соработка со мојот тим и со партнери со напредно размислување како што е „Норвешкиот шах“, нашата цел е да ја развиеме Светската шаховска турнеја во тотален шах во најпривлечниот интелектуален спортски настан во светот – вели Аркадиј Дворкович, пренесе ФИДЕ.
Пилот-турнир е планиран за наесен, по што следува целосна сезона во 2027 година. Г.И.
