- Годинашниот настан е тест за инаугуративната сезона во 2027 година, на која ќе биде крунисан првиот светски шампион во тотален шах.
На пилот-настанот, 24-те шахисти ќе играат забрзан класичен шах, забрзан и брз шах, за вкупна победа на турнирот
Првите 16 играчи се одредени за пилот-турнирот на Светско првенство (СП) во тотален шах за 2026 година, објавија Светската шаховска федерација (ФИДЕ) и Норвешки шах. Годинашниот настан е тест за инаугуративната сезона во 2027 година, на која ќе биде крунисан првиот светски шампион во тотален шах. Пилот-турнирот е закажан за октомври годинава, а локацијата ќе биде објавена подоцна.
За разлика од циклусот на СП на ФИДЕ, кој претежно вклучува класичен шах, тоталниот се состои од три временски контроли, забрзан класичен, забрзан и брз шах. Уште два учесника, поточно победниците на турнирите на кандидатите за светски првак и првенка, ќе се квалификуваат во април, пишува шаховската интернет-страница „Чес“.
На пилот-настанот, 24-те играчи ќе бидат поделени во четири групи, кои ќе се натпреваруваат во забрзан класичен шах (играјќи еден против друг двапати). Победниците од секоја група ќе играат нокаут-систем со четири играчи, кој вклучува забрзан класичен (45 минути плус 30 секунди по секој потег), забрзан (15 минути плус 10 секунди) и брз шах (три минути плус две секунди), за вкупна победа на турнирот. Оние што ќе се пласираат на второто место во своите групи ќе играат за пласман на петтото место, оние што ќе бидат трети за деветтото итн.
Во почетокот на декември организаторите ги објавија квалификациските патеки, а 16 од 24-те места сега се пополнети. Пласираните играчи се Домараџу Гукеш (актуелен светски шампион во класичен шах), Ју Венјун (актуелна светска првенка во класичен шах), Норвежанецот Магнус Карлсен (прв на СП во забрзан шах во 2025 година), Русинот Владислав Артемиев (втор на СП 2025 во забрзан шах), Индиецот Арџун Еригаиси (трет на СП 2025 во забрзан шах), Узбекистанецот Нодирбек Абдусаторов (втор на СП 2025 во брз шах), Французинот Максим Вашер-Леграв (следен најдобар во генералниот пласман на СП 2025 во забрзан и во брз шах), Американците Хикару Накамура и Фабијано Каруана, Германецот Винсент Кејмер, Холанѓанецот Аниш Гири, Французинот Алиреза Фирузја, Индиецот Прагнананда Рамешбабу, Кинезот Веи Ји (сите преку рејтинг), Американецот Весли Со (прва замена како следен најдобар во генералниот пласман на СП 2025 во забрзан и во брз шах) и Индиецот Вишванатан Ананд (втора замена според рејтингот). Г.И.
