ФУДБАЛ – АНГЛИСКА ПРЕМИЕР-ЛИГА
- Од вкупно 301 гол постигнати во 110 натпревари по 11 кола, 196 се постигнати во отворена игра, што е просек од 1,78 по средба и е на пат да биде најниско во претходните 16 години, пишува „Би-би-си“
Една од најголемите приказни за сезоната во англиската фудбалска Премиер-лига досега е падот на головите постигнати во отворена игра и како тимовите постигнуваа повеќе голови од прекини, пишува „Би-би-си“. Кога се споредува како се постигнати головите во првите 11 кола во минатата сезона, има 39 помалку погодока во отворена игра и 26 повеќе од прекини и од пенали, што дава вкупно 13 помалку погодоци. Ако се погледнат пошироката слика и бројот на шутеви на тимовите, сезонава има неверојатни 370 удари помалку во отворена игра отколку во оваа фаза во минатата сезона, пишува „Би-би-си“.
И покрај големото зголемување на головите од прекини, имаше само два повеќе шута генерирани од нив без пеналите, што покажува колку ефикасни биле тимовите во наоѓањето начини за постигнување голови од ситуации при прекин на играта. Вкупно 301 гол постигнати во 110 натпревари по 11 кола во просек изнесува 2,74 погодока по меч, што ако продолжи во текот на целата сезона, би било најниско во претходните пет сезони, од сезоната 2020/2021 (просек од 2,69). Но само 196 гола постигнати во отворена игра во просек изнесува 1,78 по средба и е на пат да биде најниско во претходните 16 години, од сезоната 2009/2010 (просек 1,76), а таа сезона исто така е единствената во Премиер-лигата во која головите се постигнуваат почесто од прекини (без пеналите) отколку просекот сезонава, кој е 0,77 по дуел (0,79 тогаш), пишува „Би-би-си“.
Во однос на головите од отворена игра, Вулверхемптон забележа најголем пад, постигнувајќи само четири на 11 меча, 10 помалку отколку во оваа фаза лани, а пет од седумте тима во Лондон постигнаа најмалку пет гола помалку од отворена игра отколку во минатата сезона, пишува „Би-би-си“. Тоа во голема мера се должи на тоа што постигнаа многу голови на почетокот на минатата сезона, а не на тоа што навистина се мачеа да постигнат голови во отворена игра сезонава, пишува „Би-би-си“. Манчестер сити забележа најголемо зголемување, при што сите освен еден од нивните 23 гола постигнати сезонава дојдоа во отворена игра. Кога станува збор за голови постигнати од прекини (без пенали), Арсенал и Челси имаат најголемо зголемување, при што двата тима ги заменија петте помалку гола што ги постигнаа во отворена игра со ист број од ситуации при прекин на играта, Манчестер јунајтед постигна двојно повеќе голови од прекини отколку во 11-те средби во минатата сезона, пред Рубен Аморим да ја преземе функцијата… пишува „Би-би-си“.
Ќе биде интересно да се види дали екипите ќе продолжат толку многу да се потпираат на прекините во текот на сезоната или ќе ја откријат повторно својата сеопфатна креативност и ќе почнат да постигнуваат повеќе голови и во отворена игра, пишува „Би-би-си“. Н.М.
