Вчера локални избори во Косово
- Според српската јавност, косовските локални избори се одржуваат во исклучително тежок момент за Србите во Косово, но во исто време гласањето е важно бидејќи претставува можност за српската заедница, која ги напушти локалните институции и ги бојкотираше претходните избори, да ја врати власта во четирите општини на северот на Косово каде што Србите се мнозинско население
- Во август беше одбиена регистрацијата на Српската листа (СЛ) за локалните избори, по што партијата поддржана од официјален Белград поднесе жалба до Комисијата за жалби и приговори на изборите (ЕКАП), која беше прифатена, па ЦИК беше обврзана да ги регистрира нејзините кандидати за советници во 19 општини и за градоначалници во 11 општини
Вкупно 206 кандидати за градоначалници и 5.420 за советници учествуваа на вчерашните локални избори во Косово, на кои право на глас имаа 2.069.098 гласачи во 38 општини. За косовските Срби овие избори се сметаат за „тест за нивното враќање во институционалната рамка“ на Косово, но во српската заедница постојат загрижености во врска со заштитата на правата и слободите, проблемите со регистрацијата и бришењето на гласачите и приговорите дека одредени изборни процеси не се целосно транспарентни.
Во август беше одбиена регистрацијата на Српската листа (СЛ) за локалните избори, по што партијата поддржана од официјален Белград поднесе жалба до Комисијата за жалби и приговори на изборите (ЕКАП) на одлуката на Централната изборна комисија (ЦИК).
Одлуката на косовската ЦИК беше критикувана од земјите од Квинтата, односно од Европската Унија, а кон крајот на август, жалбата на СЛ беше прифатена, со што ЦИК беше обврзана да ги регистрира нејзините кандидати за советници во 19 општини и за градоначалници во 11 општини.
Српската листа одлучи да учествува на локалните избори годинава, откако го бојкотираше претходниот циклус. На тој начин им беше овозможено на градоначалниците Албанци, со одзив од нешто над 3,4 проценти од гласачите во северно Косово, да ја преземат власта во четири општини со српско мнозинство од мај 2023 година.
Според српската јавност, косовските локални избори се одржуваат во исклучително тежок момент за Србите во Косово, но во исто време гласањето е важно бидејќи претставува можност за српската заедница, која ги напушти локалните институции и ги бојкотираше претходните избори, да ја врати власта во четирите општини на северот на Косово каде што Србите се мнозинско население. И претставниците на Србите од Косово и властите во Белград велат дека тие избори се „судбоносни“ и од големо значење за Србите во Косово.
Поддршка од Белград, кога станува збор за српските партии на Косово, има само Српската листа, но, покрај неа, на гласачките ливчиња во Косово се и Партијата за слобода, правда и опстанок на Ненад Рашиќ, Српска демократија на Александар Арсенијевиќ, Српското народно движење на Милије Бишевац, косовскиот сојуз на Горан Маринковиќ, како и неколку граѓански иницијативи.
Косовските изборни власти првично одбија да акредитираат 28 локални и меѓународни медиуми за покривање на локалните избори, меѓу кои претежно беа оние што известуваат на српски јазик и кои се финансирани од Србија. Но ЦИК ја поништи таквата одлука под притисок на меѓународната заедница. Р.С.
