„Сообраќајни измами“ се шират и покрај голем број предупредувања и апели на надлежните
- Само во првата половина од годинава се пријавени 16 телефонски (и непосредни) измами кон граѓани со приказна за „сообраќајна незгода на близок во семејството и потребна итна помош“… За период од пет години се расветлени 40 настани, велат од МВР, но попусто кога штетите веќе се направени и многу луѓе, претежно од постарите генерации, се оштетени материјално, со што некои од нив веројатно ја дале сета заштеда за да ги „спасат“ своите најмили
- Фактот дека во Македонија сѐ уште успеваат такви измами укажува на тоа дека повозрасните лица (или барем не сите) сѐ уште не се информирани, односно дека јавноста не успева ефикасно да се мобилизира околу некоја штетна појава. Таквата состојба укажува и на еден друг општествен сегмент: дека постарите генерации се изолирани, односно дека има јаз помеѓу постарите генерации и помладите при недоволна комуникација и генерално во општеството. Затоа е потребно сите да се вклучат во сузбивање на оваа штетна појава
Телефонски повици со лажни приказни за учество на најблиските во сообраќајни несреќи и натаму успеваат на измама да извлечат големи суми пари, главно од повозрасни граѓани, со што нивната појава во Македонија особено зачести годинава. На тој начин, 76-годишна жена од Тетово месецов останала без 20 илјади евра. Нејзиниот случај е меѓу 16-те такви измами пријавени во полиција годинава.
Ги фрлила парите од балкон за да му ги даде на измамникот
На 7 август, во 21 часот, во СВР Тетово, 76-годишна жена од Тетово пријавила дека била измамена од едно лице за сума од 20.000 евра. Според пријавеното, лицето ја побарало телефонски, се претставило како лекар и ѝ кажало дека нејзината ќерка била прегазена на пешачки премин и дека е потребно да плати голема сума пари за да биде оперирана.
– Уште една, којзнае која по ред, измама со телефонски повик и приказна за сообраќајна несреќа успеала некни во Тетово, каде што 83-годишна жена му дала на непознатиот измамник 2.000 евра за нејзината ќерка наводно да се спаси од затвор – соопшти МВР.
Друга жена наседнала на телефонска измама за лажна сообраќајна несреќа и платила 16.000 евра и 10.700 швајцарски франци, при што парите ги фрлила од балкон за да му ги даде на измамникот, пишуваат медиуми на албански јазик.
Министерот Тошковски апелира: Прекинете ја комуникацијата кога ќе се посомневате на измама
Само во првата половина од годинава се пријавени 16 такви измами, а за период од пет години се расветлени 40 настани, велат од МВР, но попусто кога штетите веќе се направени и многу луѓе претежно од постарите генерации се оштетени материјално, со што некои од нив веројатно ја дале сета заштеда за да ги „спасат“ своите најмили.
– Телефонските измами со наводни сообраќајни незгоди сѐ почесто целат на постарите граѓани. Наша заедничка одговорност е да им укажеме како да ги препознаат и да се заштитат – истакна министерот за внатрешни работи Панче Тошковски неодамна преку видеоснимка објавена на неговиот профил на социјалната мрежа Фејсбук.
Но проблемот не е во тоа кога тие ќе препознаат дека станува збор за телефонска измама, туку кога нема да се сомневаат, дали од паника за своите најблиски во наводната сообраќајка или бидејќи не се доволно информирани и затоа што апелите никогаш не стигнале до нив.
Министерот Тошковски и полициски службеници од Одделението за превенција при СВР Скопје пред некој ден веќе реализираа превентивна акција „Внимавај, телефонски измами“ насочена кон едукација на нашите повозрасни граѓани, кои се најчеста жртва на таквите измами.
– Преку непосреден разговор и делење едукативен материјал граѓаните беа едуцирани дека најчест вид на измама е измамата со лажна сообраќајна незгода во која измамниците претставувајќи се на телефон како полициски службеник, адвокат, обвинител или доктор ги лажат жртвите дека нивното дете повредило некого во сообраќајна незгода и се обидуваат да извлечат пари од жртвата така што за одредена сума би му помогнале на детето што е во неволја – велат од МВР.
Министерот ги советува жртвите да не продолжуваат со комуникација кога ќе се посомневаат дека станува збор за измама, да го исклучат телефонот и веднаш да се јават на телефонскиот број 112, кој е во Центарот за управување со кризи и ќе ги пренасочи во МВР откако ќе кажат дека се сомневаат за измама или директно да ѕвонат на 192 во МВР.
– Измамниците на тој начин се обидуваат да ги злоупотребат повозрасните лица. Денес во градскиот парк во Скопје успеавме да разговараме со голем број повозрасни лица и да ги информираме за таквите измами и начинот на работа на измамниците. Апелираме доколку некој добие таков повик и е потенцијална жртва на таква измама, никако да не дава пари, да го прекине разговорот, веднаш да ја повика полицијата на 112 или 192 и да ги извести и своите најблиски – нагласи министерот Тошковски.
Неопходен целокупен ангажман на општеството, не само на надлежните
Фактот дека во Македонија сѐ уште успеваат такви измами укажува на тоа дека повозрасните лица (или барем не сите) сѐ уште не се информирани, односно дека општеството не успева да се мобилизира околу некоја штетна појава. Таквата состојба укажува и на тоа дека постарите генерации се изолирани, односно дека има јаз помеѓу постарите генерации и помладите при недоволна комуникација и генерално во општеството. Затоа, неопходно е сите да се вклучат во сузбивање на оваа штетна појава. Покрај надлежните, потребно е и помладите генерации да ги информираат постарите за оваа појава, потребни се дополнителни апели од медиумите, а не само површно известување со основни информации пренесени од билтенот на МВР кога ќе се случи телефонска измама како во тромо општество, кое не е способно да се загрижи, да алармира и да ги заштити најзасегнатите од некоја штетна појава. Само така може да им се стави крај на ваквите измами.
Сотир Ристо
