Животни
Дигестивните проблеми кај домашните миленици се меѓу најчестите причини за посета на ветеринар. Дигестивниот систем е често првиот што укажува на нарушување во телото – без разлика дали станува збор за мала иритација или за посериозна болест што бара итно внимание. Повраќање, дијареја, губење на апетитот, надуеност или запек се знаци што треба да се сфатат сериозно. Дијарејата е еден од најчестите симптоми на гастроинтестинални нарушувања. Понекогаш се јавува поради промени во исхраната, внесување расипана храна или загадена вода, додека во други случаи може да укажува на присуство на вируси, бактерии, паразити, алергиски реакции или хронични воспалителни заболувања на цревата. Доколку трае подолго од еден ден, особено кај млади животни, дијарејата може да предизвика дехидратација и губење електролити, што дополнително ја загрозува општата состојба.
Повраќањето може да биде резултат на брзо внесување храна, прејадување, благо воспаление на желудникот, но и посериозни состојби, како што се присуство на туѓо тело, заболување на црниот дроб, панкреасот или бубрезите. Доколку се јавува повремено и без други симптоми, доволен е краток прекин во исхраната и преминување на лесно сварлива храна. Запекот е почест кај постарите кучиња, особено ако немаат физичка активност или консумираат премалку растителни влакна и течности. Продолжената констипација може да доведе до мегаколон и трајно оштетување. Третманот вклучува промена на исхраната, хидратација, лаксативи, додека во потешки случаи се користи клизма или хируршки пристап. Воспалението на панкреасот, или панкреатитис, е едно од посериозните гастроинтестинални заболувања, почесто кај кучињата, особено по јадење масна храна. Симптомите вклучуваат ненадејно повраќање, болки во стомакот, летаргија и одбивање да се јаде. Состојбата бара итна ветеринарна интервенција, често хоспитализација, инфузија и преминување на посебна диета со малку маснотии. Ако не се лекува навреме, панкреатитисот може да предизвика системско воспаление и да го загрози животот на миленичето. Паразитите се уште една честа причина за дигестивни проблеми. Тркалезните црви, тениите и џардијата предизвикуваат дијареја, надуеност, губење тежина, повраќање и слаб апетит. Тешките инфекции исто така предизвикуваат анемија. Превенцијата вклучува редовна дехелминтизација и добра хигиена на садовите и површините за храна и вода. Заболувањата на црниот дроб, како што се хепатитис или цироза, исто така влијаат на дигестивниот систем. Тие можат да предизвикаат повраќање, дијареја, губење апетит и промени во бојата на столицата, а во потешки случаи и жолтица.
