МВР соопшти дека Одделот за внатрешна контрола, криминалистички истраги и професионални стандарди до Основното јавно обвинителство за гонење организиран криминал и корупција – Специјализирано одделение за гонење кривични дела сторени од лица со полициски овластувања и припадници на затворска полиција, поднесе кривична пријава против А.Ј. и Д.Ј., двајцата од Куманово, поради постоење основи на сомнение за сторени кривични дела „злоупотреба на службената положба и овластување“, „фалсификување исправа“ и „спречување на докажување“.
Се работи за полициски службеник и за неговиот началник кои овозможиле стекнување противправна имотна корист за друг во износ од 7.640 евра или 469.860 денари и спречиле докажување на кривично дело.
Одделот за внатрешна контрола, криминалистички истраги и професионални стандарди против А.Ј. и Д.Ј. ќе поднесе предлог за поведување постапка за утврдување дисциплинска одговорност. Тие ќе бидат и суспендирани од своето работно место до завршување на дисциплинската постапка.
-Првопријавениот А.Ј., полициски службеник во СВР Куманово, наместо да поднесе кривична пријава против лице од Скопје за кривично дело „фалсификување исправа“ поради извршена промена на идентификационен број на шасија на патничко возило „бмв“, кое било одземено од полициски службеници на граничен премин Табановце, на 25.12.2024 изготвил потврда за вратени предмети и на лицето од Скопје му го вратил одземеното возило, сообраќајната дозвола и клучот од возилото. На 06.02.2025 А.Ј. сочинил и потпишал известување до ОЈО Куманово кое го потпишал и одобрил второпријавениот Д.Ј., началник на првопријавениот. Доставиле потврда за вратени предмети, во која првопријавениот внел податоци за наведеното возило со променет идентификационен број на шасија и на тој начин овозможиле противправна имотна корист за друг во износ од 7.640 евра или во денарска противвредност од 469.860 денари – наведува МВР.
На 18.08.2023 првопријавениот доставил известување до ОЈО Куманово кое го одобрил второпријавениот во својство на началник на Одделението за криминалистичка полиција, во врска со пријавено кривично дело „предизвикување општа опасност“ по член 288 од Кривичниот законик, кое се случило на 15.06.2023 од сторител од Куманово.
-При преземање мерки за расчистување на делото била пронајдена една пушка и бил сочинет записник и фото документација. Првопријавениот не известил надлежен јавен обвинител и во наведеното известувањето до ОЈО Куманово не ја доставил пушката, записникот за пронајдени предмети и не побарал наредба од јавниот обвинител за вештачење на пронајденото оружје, со што од страна на ОЈО Куманово овозможил да биде запрено гонењето на сторителот, односно пријавените службени лица, злоупотребувајќи ја својата положба со неизвршување на својата службена должност, спречиле докажување на предметното кривично дело, со што потешко ги повредиле правата на оштетените пријавители на кривично дело „предизвикување општа опасност“ – информира МВР.
