Во ледените пространства на Антарктикот, во далечната 1935 година, во планинскиот венец Елсворт беше откриена планина со необична форма – речиси совршена пирамида широка околу два километри во основата. Оваа структура предизвика многубројни шпекулации, од тврдења дека се остатоци од античка цивилизација до теории за тајни воени бази и вонземјани.
Научниците од Универзитетот во Калифорнија одговорија и понудија рационално објаснување: оваа „пирамида“ е сосема природна геолошка формација. Геолозите истакнуваат дека оваа структура е дел од групата нунатаки – планински врвови што излегуваат од глечерите. Нунатаки се формираат кога ветрот и ледените плочи обликуваат карпи во текот на милиони години, создавајќи остри и симетрични врвови. Оваа специфична формација е создадена преку процес на глацијална ерозија, велат тие, во која глечерите полека ги обликувале карпите, оставајќи зад себе карактеристични стрмни страни.
Глечерната ерозија настанува кога водата што ги исполнува пукнатините во карпите замрзнува. Во конкретниот случај, истакнуваат истражувачите, мразот ги проширил овие области безброј пати во текот на десетици милиони години, постепено давајќи ѝ на планината пирамидална форма. Иако на прв поглед се чини дека е структура направена од човек, слични пирамидални планини се наоѓаат насекаде низ светот. Еден од најпознатите примери е Матерхорн на Алпите, кој исто така има речиси совршена форма на пирамида.
И покрај научните објаснувања, многумина веруваат дека оваа пирамида е дел од изгубената античка цивилизација. Некои теоретичари на заговор тврдат дека Антарктикот некогаш бил населен и можеби бил дом на древни народи, чии траги остануваат скриени под мразот. Геолошките истражувања сепак покажуваат дека Антарктикот бил покриен со мраз најмалку 34 милиони години, што ја исклучува можноста дека во тој период постоел човечки живот. Друга популарна теорија ја поврзува оваа формација со вонземјани, тврдејќи дека нејзината прецизна форма е премногу совршена за да биде природна.
Научниците, сепак, нагласуваат дека природата често создава совршени геометриски форми – од кристали до планински врвови, па затоа е можно создавање на правилна пирамида на Јужниот пол, без разлика на нејзината големина.
