Репрезентативците во Стара Пазова (Србија) ќе тренираат до 30 декември, по новогодишните празници ќе продолжат со подготовките во Македонија. Според планот, во Хрватска се патува на 7 јануари, а подготовките ќе бидат завршени во Вараждин, каде што црвено-жолтите ќе ги играат натпреварите од групата Д, со Унгарија, Холандија и со Гвинеја, од 15 до 19 јануари. Македонија, за која ова ќе биде деветти настап на СП, од 2012 година не пропушти ниту едно светско или европско првенство
Македонската машка ракометна репрезентација вчераутро го имаше својот прв собир во Скопје, а потоа веднаш замина за Стара Пазова (Србија), каде што до 30 декември ќе се подготвува за настап на 29-то Светско првенство, кое треба да се игра во јануари в година, во Хрватска, Данска и во Норвешка. Избраниците на селекторот Кирил Лазаров во Скопје ќе се вратат пред новогодишните празници, а потоа во Македонија ќе продолжат со подготовките за СП 2025.
Според планот, во Хрватска се патува на 7 јануари, а подготовките ќе бидат завршени во Вараждин, каде што Македонија ќе ги игра натпреварите од својата група Д, во која се и селекциите на Унгарија, Холандија и на Гвинеја. Првите три репрезентации од секоја од осумте групи ќе играат во втората групна фаза на Мундијалот в година, во која ќе има четири нови групи, од кои, пак, двете првопласирани селекции ќе настапат во четврт-финалето. Групата Д во втората рунда ќе вкрсти со репрезентациите од групата Ц, во која се Франција, Австрија, Катар и Кувајт.
За Македонија ова ќе биде деветти настап на ракометните мундијали, а вкупно 17-ти на големите турнири, заедно со европските првенства (ЕП). Црвено-жолтите од 2012 година не пропуштија ниту едно светско или европско првенство и претстојниот планетарен собир ќе биде 14-ти голем турнир во низа за црвено-жолтите.
Најуспешна репрезентација на светските првенства е Франција со шест трофеи, а потоа се Шведска и Романија со по четири пехари. Титулата на СП 2025 ќе ја брани репрезентацијата на Данска, која е трикратен светски шампион во низа, почнувајќи од 2019 година. Г.И.
СП 2025, ГРУПА Д
Унгарија – Македонија 15.1
Холандија – Гвинеја 15.1
Холандија – Македонија 17.1
Гвинеја – Унгарија 17.1
Македонија – Гвинеја 19.1
Унгарија – Холандија 19.1
