МВР со предупредување го граѓаните за нови форми на измами на интернет
Забележана зголемена активност на измамници што преку социјалните мрежи се претставуваат како „финансиски советници“ и најчесто нудат услуги за тргување со криптовалути, известува Министерството за внатрешни работи, предупредувајќи ги граѓаните.
Тие лица, се наведува во соопштението од МВР, се рекламираат со лажни профили или спонзорирани реклами, често ветувајќи висока заработка и брзи добивки, со што успеваат да ги привлечат жртвите што бараат начин да инвестираат.
– По воспоставувањето контакт преку социјалните мрежи, измамниците комуницираат со жртвите преку телефонски повици, користејќи броеви VOIP, кои обично изгледаат како локални броеви за да стекнат доверба. Во текот на разговорот тие ги убедуваат жртвите да инсталираат софтвер за далечински пристап, под изговор дека им е потребен за да им помогнат за поставување на платформата за тргување. Откако ќе добијат далечински пристап до компјутерот или мобилниот уред на жртвата, измамниците пристапуваат до електронското банкарство и ги префрлаат паричните средства од банкарските сметки на жртвите. Во многу случаи жртвите остануваат без средства пред да сфатат дека се измамени, а штетите се значителни – се појаснува во соопштението.
Секторот за компјутерски криминал ги советува граѓаните да бидат исклучително внимателни при комуникација со непознати лица што нудат финансиски совети преку интернет.
– Никогаш не инсталирајте софтвер за далечински пристап по барање на непознати и внимавајте на повици од непознати или сомнителни телефонски броеви. Во случај на сомневање за измама, веднаш контактирајте со вашата банка и пријавете го случајот во Министерството за внатрешни работи – предупредуваат од МВР. Н.М.
