Германија апелираше до Кина да го искористи своето влијание врз Русија во контекст на војната во Украина.
Премиерите на Германија и Кина, Олаф Шолц и Ли Чијанг денеска се сретнаа во Берлин. Средбата се одржа само еден ден откако американскиот државен секретар Ентони Блинкен се сретна со кинескиот претседател Си Џинпинг.
– Повторно апелирав до кинеската влада да изврши уште посилно влијание врз Русија во оваа војна. Важно е Кина да продолжи да не испорачува оружје на агресорот, Русија. Како постојана членка на Советот за безбедност на ОН, Кина има многу посебна должност – рече Шолц.
Ли директно не одговори ниту ја спомена Украина во својата изјава, а на конференцијата немаше прашања од новинарите.
Покрај тоа, Шолц и Ли ветија дека ќе работат заедно во борбата против климатските промени како два најголеми светски емитери на јаглерод диоксид.
– Како главни емитери на јаглероден диоксид, Германија и Кина имаат посебна одговорност во борбата против климатските промени – изјави Шолц.
Ли рече дека „за двете страни, справувањето со климатските промени треба да стане важно поле на соработка“.
Ова е прво патување на Ли во странство откако тој стана премиер во март.
Германија сака да одржува добри односи со Кина, нејзиниот најголем трговски партнер, и покрај загриженоста поради одбивањето на Пекинг да ја критикува руската инвазија на Украина.
Во неодамна објавената стратегија за национална безбедност на Германија, Кина се карактеризира како „партнер, конкурент и системски ривал“.
