Заменик-претседателот на Владата задолжен за европски прашања, Бојан Маричиќ, заедно со српската министерка за евроинтеграции, Јадранка Јоксимовиќ, после одржаната билатерална средба, најавија дека соработката помеѓу Македонија и Србија ќе се интензивира во делот на евроинтеграцискиот процес, во пресрет на почетокот на преговори на Македонија со Европската Унија и преку нови проекти поддржани од европските фондови.
– Со задоволство ја прифатив идејата на српската колешка Јоксимовиќ, да направиме Меморандум за соработка во делот на евроинтеграциите, надграден во контекст на новата методологија, што во овој момент на почеток на преговорите за нас ќе биде корисно за двете држави, бидејќи ако работиме заедно ќе можеме да напредуваме побрзо и да имаме подобри резултати за нашите граѓани – изјави вицепремиерот Маричиќ.
Јоксимовиќ изјави дека во идниот период ќе се интензивираат консултациите со Македонија во областа на европските интеграции, бидејќи како што изјави пренесувањето искуства и каква било помош во делот на преговорите е во интерес на добрососедските односи, како и во интерес на забрзување на реформите и напредокот на граѓаните на двете земји.
Вицепремиерот Маричиќ рече дека Македонија и Србија веќе покажаа многу во реформите и решавањето на тешките прашања, и дека тоа ги прави кредибилен партнер на Европската унија двете земји, додавајќи дека очекува земјите од регионот бидат вклучени во решавањето на сегашните и идните кризи поврзани со енергетското снабдување, со снабдувањето со храна и струја.
Маричиќ и Јоксимовиќ констатираа дека ќе продолжи регионалната соработка уште поинтензивно, како соседи, сè во интерес на економскиот просперитет, намалувањето на последиците кои ги носи овој тежок период.
– Ние разговаравме и за бројни проекти финансирани од ЕУ во рамки на Европскиот инвестициски план за Западен Балкан, за гасниот интерконектор меѓу Србија и Северна Македонија, што во овој момент е од исклучително значење за граѓаните – изјави министерката Јоксимовиќ.
На средбата беше разговарано за важноста на почетокот на преговори на Северна Македонија со Европската Унијата, предизвиците со кои државата може да се соочи во тој процес, за поддршката и размената на искуства кои ги има Србија, како земја која преговара 8 години, и интензивирање на регионалната соработка во пресрет на зимата која доаѓа и заедничкото делување против последиците од енергетската и безбедносна криза.
Вицепремиерот Маричиќ оваа средба ја реализираше во рамки на посетата на првиот Меѓународен саем за вино, храна и туризам „Винска Визија на Отворен Балкан“ во Белград, кој се одржува од 1-4 септември.
Лидерски самит и Македонска вечер во рамки на „Отворен Балкан“ во Белград
Лидерски самит на претседателот Србија Александар Вучиќ и на премиерите на Македонија и на Албанија Димитар Ковачевски и Еди Рама, како и Македонска вечер, чиј домаќин е македонскиот премиер, ќе се одржат денеска во рамки на иницијативата „Отворен Балкан“, што втор ден се одржува во Белград.
Како што јави дописникот на МИА од Белград, во Палата Србија ќе се одржи политичкиот дел од Самитот Отворен Балкан, по кој српскиот претседател Александар Вучиќ и македонскиот и албанскиот премиер Еди Рама ќе одржат прес-конференција. На него ќе присуствуваат и црногорскиот премиер Дритан Абазовиќ, претседателот на Советот на министри на Босна и Херцеговина, Зоран Тегелтија и министрите за надворешни работи на Унгарија и Турција, Петер Сијарто и Мевлут Чавушоглу.
Самитот ќе започне со пленарен состанок на министрите за надворешни работи на Србија и Албанија и вицепремиерот за европски прашања Бојан Маричиќ.
Предвидени се состаноци на лидерите со Инвестицијската иницијатива на ОБ, подржано од Атланскиот совет, сотанок на групата за менаџирање на кризи за храна и енергетика и потпишување на повеќе билатерални документи и меорандуми.
Македонската влада во понеделникот усвои повеќе извештаи за завршени преговори и утврдени текст-документи во рамки на регионалната иницијатива „Отворен Балкан”, а кои ќе бидат финиширани за време на посетата на владината делегација во Белград.
Усвоен е Извештајот за завршени преговори за склучување на Договор за соработка во областа на механизмите за обезбеденост со храна во Западен Балкан и беше прифатен текстот на Договорот, беше прифатен и Извештајот за завршени преговори со усогласен текст на Меморандум за разбирање и соработка во областа на кинематографијата и аудиовизуелните дејности во Западен Балкан, усвоена е и Информација за усвојување на Оперативен План во областа на цивилната заштита помеѓу овие три земји во рамките на Иницијативата „Отворен Балкан”.
Вечер, на 2 септември, премиерот Димитар Ковачевски пред претставници на бизнис заедниците и владите од Србија, Албанија и Македонија ќе приреди Македонска вечер, на која ќе се промовираат македонски вина, храна, музика и туризам, а за музичкиот дел е задолжен виртуозот Влатко Стефановски.
Во состав на македонската делегација во Белград, која ја предводи премиерот Димитар Ковачевски се и вицепремеирот Бојан Маричиќ, како и министрите Љупчо Николовски, Кресник Бектеши и Никола Тупанчевски.
Како што дознава МИА на самитот се очекува денес да дојде и поранешниот премиер Зоран Заев, еден од иницијаторите на создавањето на „Отворен Балкан“.
Вчера на Белградскиот саем, во рамки на Иницијативата „Отворен Балкан“, Србија, Македонија и Албанија во Белград го отворија Првиот меѓународен саем за вино Винска визија на Отворен Балкан.
Премиерот Димитар Ковачевски, на отворањето на саемот за вино, храна и туризам изјави дека Отворен Балкан денеска покажува што значи интеграција, олеснет пристап, практична примена на политика на отворени врати и на добрососедство.
-Денеска тука ги поврзуваме нашите економии, отвораме нови пазари и пласмани, обезбедуваме простор за размена на нови идеи, технологии и пристапи за работа – изјави македонскиот премиер.
На отворањето на саемот каде присуствуваа и премиерот на Албанија, Еди Рама и претседателот на Србија Александар Вучиќ, Ковачевски истакна дека тука се вкрстуваат винските патишта на Балканот, со тоа што на едно место се пресретнуваат производителите, откупувачите и дестилариите од регионот.
На Белградскиот саем присуствуваат над 350 излагачи од 39 земји од кои 160 излагачи од Србија, 26 од Албанија, додека 47 излагачи се од Северна Македонија. Покрај земјите-членки на Отворениот Балкан, изложувачи има и од Хрватска, Босна и Херцеговина, Црна Гора, Франција, Чиле, Аргентина, Италија, Романија, Молдавија, Јужна Африка и други земји. Со оглед дека и храната е во фокусот, како вид традиција, има и пет мастер шефови од Северна Македонија, од Србија и од Албанија, како и специјален гостин изненадување. На манифестацијата има купувачи од ЕУ, САД, Кина и други земји од Истокот. Вкупно 300 метри квадратни, се резервирани за туризмот, каде е присутна и македонската Агенција за промоција на туризмот.
Според организаторите, само првиот ден од саемот имало 420 состаноци на стопанственици.
Македонија под слоганот „Вкуси го животот” на Саемот учествува со 42 винарии и три дестилерии кои ќе промовираат преку 300 различни вина и ракии, како и производители на храна кои ја претставуваат автентичната македонска кујна
