Бугарските власти продолжуваат да го спречуваат регистрирањето на здруженијата на етничките Македонци, како што се ОМО Илинден, Друштвото на угнетени Македонци, жртви на комунистички терор, Граѓанско здружение за заштита на фундаменталните индивидуални човекови права и Македонскиот клуб за етничка толеранција во Бугарија, наспроти 14-те претходни одлуки на Европскиот суд за човекови права во врска со нарушувањето на слободите на здруженијата, се вели во извештајот на Стејт департментот за човековите права во Бугарија за 2021 година.
Во еден пример, на 31 мај, Апелациониот суд во Софија ја потврди одлуката на Агенцијата за регистрација од ноември 2020 година, со која се спречува регистрацијата на Друштвото на угнетени Македонци, жртви на комунистички терор, врз основа на тврдењето оти здружението ќе се залага за политичка агенда што се заканува на единството и безбедноста на нацијата, односно што би ги нарушила правата на преостанатото население во државата кое не се идентификува како македонско.
ОМО Илинден, пак, го посочи случајот во Благоевград, во кој попишувачите им кажале на граѓаните што ги посетиле дека поимот „Македонец“ не е достапна опција за етничка идентификација.
Забележани проблеми со човековите права, со независноста на судството и корупцијата
Бугарија има значителни проблеми со човековите права, сериозни проблеми со независноста на судството, корупција, нетолеранција и ограничувања на слободното изразување, вклучително и закани за насилство врз новинарите и корпоративен и политички притисок врз медиумите во земјата. Тоа е наведено во годишниот извештај на Стејт департментот за човекови права на во Бугарија минатата година. Амбасадата на САД во Софија го објави делот од извештајот кој се однесува на Бугарија.
Како што јави дописникот на МИА од Софија, во извештајот се соопштува за сериозна корупција. Корупцијата, заедно со неефикасноста и недостиг на отчетност, се меѓу причините за ниското ниво на доверба во судството, и покрај тоа што Уставот и законите предвидуваат тоа да биде независно. Во Извештајот се изразува загриженост поради недостигот на судска контрола против одлуката на обвинителството да не покрене истрага и поради влијанието на обвинителството врз Вишиот судски совет на Бугарија.
Американскиот Стејт департмент обрнува вниманието и на податоците за нелегалното прислушување и следење во Бугарија, повикувајќи се на заклучокот на специјалната комисија во Националното собрание за над 900 лица, меѓу кои и политичари, судии и новинари кои биле следени за време на антивладината протести во 2020 година. Извештајот ја разгледува и истрагата за полициското насилство врз демонстрантите.
Во документот се наведува дека независните медиуми биле отворено нападнати од политичари на сите нивоа и биле под административен и судски притисок. Цитирана е изјава од мај 2021 година на поранешниот генерален директор на Бугарското национално радио, Андон Балтаков, кој вели дека законот во земјата фаворизира политичко мешање во управувањето со медиумите преку контролирано финансирање.
