Претседателот на Украина Владимир Зеленски во емотивното обраќање на Минхенската безбедносна конференција го повика Западот да застане на страната на Украина, бидејќи Русија се заканува со понатамошна инвазија на неа.
Тој го критикуваше амбивалентниот став на земјите кои молчат, нагласувајќи дека оние кои не стојат на страна на Украина треба „да размислуваат за кармата“.
– Не се работи за војна во Украина, туку за војна во Европа. Украина го направи својот избор во 2014 година и многу луѓе ги жртвуваа своите животи за тоа. Од 2014 година, Русија инсистира дека сме избрале погрешно, дека никој не нѐ чека во Европа. Зарем Европа не треба постојано да кажува и да демонстрира со своите постапки дека тоа не е вистина – рече Зеленски, мислејќи на револуцијата на Евромајдан и војната во источна Украина.
Тој исто така побара да се обнови безбедносната архитектура во Европа и побара нови безбедносни гаранции за Украина.
– Безбедносната архитектура е уништена, крајно време е за нова. Имаме право да бараме да преминеме од политика на помирување кон безбедносни гаранции – рече украинскиот претседател.
Зеленски порача дека со или без помош, ќе направат се за да ја заштитат својата убава земја. Тој побара и средба со рускиот претседател Владимир Путин.
– Не знам што сака рускиот претседател, затоа сакам да се сретнам со него – рече украинскиот претседател.
Зеленски побара од Западот да не ги одложува санкциите против Русија, туку да ги спроведе превентивно, особено ако Русија не ги повлече своите 150.000 војници што ја опколуваат Украина.
