Конечно радосна вест за љубителите на планината и планинарите на Битола.
Девет години по пожарот, кој до темел го пеплоса планинарскиот дом „Копанки”, договорено е да почне неговата обнова и реконструкција.
На иницијатива на градоначалникот, Тони Коњановски и претседателката на Советот, Габриела Илиевска, во соработка со членовите на ПСК „Пелистер“ се одржа работна
средба и дружење на „Копанки“.
На средбата која беше отворена и за сите заинтересирани граѓани на Битола, беа потенцирани идните планови на Општината за обнова на планинарскиот дом
„Копанки”.
– По повеќе состаноци со вљубениците во планината и планинарските спортови, првпат после 9 години, како претставници на локалната самоуправа се наоѓаме пред
култниот планинарски дом „Копанки” на Пелистер, со верба дека наскоро ќе се исполни долгогодишната желба на битолчани: „Копанки” да биде место за чаенки на нашите
сограѓани, но и атракција за гостите на Пелистер. Со уважувањето на жалбата на Здружението планинарски спортски клуб „Пелистер” од страна на Вишиот управен суд, поништени се решенијата кои во изминатиот период беа донесени од страна на Општина
Битола и Министерството за транспорт и врски, со кои беше оневозможено обновувањето на планинарскиот дом „Копанки”. Со тоа, оваа постапка е завршена, а согласно законската регулатива, локалната самоуправа ќе даде поддршка за обнова на објектот, кој е еден од симболите на Битола, изграден во далечната 1938 година. Место кое со децении било спој на различни генерации, создавало спомени, а нудело и големи можности за развој на зимските спортови. Нашата работа е насочена токму кон слушање на барањата на граѓаните и поддршка во нивната реализација.
Токму од таа причина, денес сме тука. Заедно да придонесеме за реализација на програмската заложба со која се обврзавме да создадеме услови за модерен и
атрактивен локален туризам, а Битола со Пелистер, со своите културно историски знаменитости, но и со збогатување на понудата да прерасне во препознатлива
точка на туристичката мапа во државата, на Балканот, во Европа, па и во светот – изјави градоначалникот на Општина Битола, Тони Коњановски, при посетата на
„Копанки“.
На средбата на „Копанки”, на која присуствуваа и советниците од Советот на Општина Битола, јавноста беше информирана, дека со преземањето на иницијалните чекори,
на радост на сите битолчани, започнува реализацијата на проектот за „Копанки”.
– Копанки е на сите и ќе биде за сите нас. Она што неодамна го ветивме, од денес започнува да се реализира. Денес сме тука за да најавиме дека „Копанки” ќе се
реконструира во првата година од формирањето на Советот, односно во буџетот на Опстина Битола за 2022 година се предвидени средства за обновување на Планинарскиот дом „Копанки” – изјави Иван Чулаковски, советник во Советот на
Опстина Битола. М.М.
