Повеќе од 60 држави им пишаа на талибанците
Повеќе од 60 земји објавија заедничка изјава во која се вели дека на Авганистанците и странските државјани кои сакаат да ја напуштат земјата мора да им биде дозволено да заминат и дека аеродромите и граничните премини мора да останат отворени, соопшти американскиот Стејт департмент.
Американската влада и земјите, вклучувајќи Австрија, Велика Британија, Канада, Германија, Шпанија, Италија, Јапонија и Јужна Кореја, во заедничка изјава рекоа дека „оние кои се на позиции на моќ и авторитет низ Авганистан се одговорни за заштита на човечки животи и имот, како и што се однесува до итно враќање на безбедноста и јавниот ред “.
Тие додаваат дека „авганистанскиот народ заслужува да живее безбедно и достоинствено. Ние во меѓународната заедница сме подготвени да им помогнеме”.
Талибанците објавија крај на војната во Авганистан откако ја презедоа контролата врз претседателската палата во Кабул, во време кога силите предводени од САД заминуваат, а западните земји се обидуваат да евакуираат илјадници свои граѓани.
Пентагон одобри дополнителни 1.000 војници за да помогнат во евакуацијата на американските државјани од Кабул, како и Авганистанците кои работеа за нив, додека американската влада соопшти дека ќе ја преземе контролата врз воздушниот сообраќај за да им овозможи на илјадници Американци да заминат.
Суспендирани сите комерцијални летови од Кабул
Сите комерцијални летови од меѓународниот аеродром Хамид Карзаи во Кабул се прекинати, а властите ја повикаа јавноста да не создава метеж.
Според податоците на шведскиот портал за контрола на летање Флајтрадар 24, на два авиона од Њу Делхи им било наложено да го сменат курсот и да не летаат над територијата на Авганистан, пренесува ТАСС.
Авганистанската управа за цивилно воздухопловство (АЦВА) денеска објави дека воздушниот простор над Авганистан сега е контролиран од армијата, а АП наведува дека американската армија, која веќе го контролира аеродромот, ја презеде контролата врз воздушниот простор.
АЦВА ја потврди информацијата на шведскиот портал дека на авионите што летале над територијата на Авганистан им било препорачано да се пренасочат.
Американските и британските авиокомпании веќе престанаа да го користат воздушниот простор над Авганистан, откако бунтовниците ја презедоа контролата врз претседателската палата во Кабул.
Припадниците на талибанското движење го зазедоа главниот град Кабул, без отпор, во тек е контрола на владата и безбедносните служби, а авганистанскиот претседател Ашраф Гани ја напушти земјата.
