Двајца руски државјани, обвинети за труење на Сергеј Скрипаљ во 2018 година во градот Солсбери во Велика Британија, се поврзани со експлозијата во магацинот за оружје во Чешка, четири години претходно.
Чешката полиција покажа фотографии на Александар Петров и Руслан Боширов, за кои се тврди дека биле во земјата за време на експлозијата кога загинаа две лица. Чешка вчера протера 18 руски дипломати како одмазда, а висок руски парламентарец обвинувањата ги нарече апсурдни.
Премиерот на Чешка, Андреј Бабиш, рече дека државата мора да реагира на откритијата што ја поврзуваат експлозијата со руската разузнавачка служба ГРУ. Синоќа Бабиш рече дека е утврдено дека 18 руски дипломати во Чешка работат за руските разузнавачки служби и дека имаат 48 часа да ја напуштат земјата.
Постои основано сомнение дека руски тајни агенти од службата ГРУ учествувале во експлозиите во 2014 година во чешкото село Врбетице – рече Бабиш.
По инцидентот во Солсбери, двајцата беа идентификувани како Александар Мишкин и Анатолиј Чепига, а тие повремено се појавуваа на руската телевизија, тврдејќи дека станува збор за спортски нутриционисти кои го посетиле Солсбери за да ја видат катедралата. Сепак, британските власти велат дека тие се членови на службата ГРУ и дека го поставиле нервниот агенс „новичок“ на рачката на вратата од куќата што му припаѓа на Скрипаj, поранешен службеник за разузнавање на ГРУ.
САД во четвртокот соопштија дека ќе протераат десет руски дипломати од руската амбасада во Вашингтон, како одговор на сајбер-нападите и останати руски активности. Москва возврати на ист начин, нагласувајќи дека десет американски дипломати ќе мораат да ја напуштат Русија.
