Градоначалникот Шилегов, одговарајќи на советничко прашање, детално го објасни проектот за уредување на кејот „13 Ноември“, на потегот од градскиот плоштад до улицата Стив Наумов.
– Пред неколку дена веќе започнаа градежните активности за реконструкција на кејот „13 Ноември“, таму е предвидено целосно преуредување на партерот, во оваа фаза се врши отстранување на терасите од страна на локалите што таму беа поставени во минатото. Проектот ѝ беше претставен на јавноста, веќе нема да има централни таканаречени тераси во средината, тоа ќе биде целосно еден јавен простор што ќе им служи на граѓаните како шеталиште. Во согласност со програмата што ја носи Општина Центар за поставување урбана опрема, веројатно ќе има зголемување на терасите, односно предните тераси на локалите.
Исто така, бидејќи станува збор за секундарна сообраќајница, ќе биде сообраќајно решено движењето на возилата по договорот со „Телеком“, кој, за жал, ние го имаме наследено, меѓутоа ќе станува збор за движење на сериозно редуциран број на возила, со ново паметно решение, со кое со препознавање на патниците ќе се подигнува рампата, па потоа и втората рампа ќе треба да го препознае возилото за да може да влезе на кејот, и тоа во строго определени часови во текот на денот, од час до час и половина, исклучиво наутро кога одат на работа и попладне кога излегуваат од работа, од 8 до 9.30 часот наутро и од 14 до 17.30 часот. Тоа ќе бидат ограничен број возила што ќе добијат посебни одобренија и ќе бидат внесени во софтверот за да може да се контролира нивното движење – изјави Шилегов во неговиот одговор на советничкото прашање.
