ФУДБАЛ
По дискусиите во рамките на Европските спортски медиуми (ЕСМ), беше решено да се продолжи со рангирањето за „златната копачка“ за најдобриот стрелец во домашните фудбалски првенства во Европа сезонава, и покрај паузата поради пандемијата на коронавирусот, објави германскиот весник „Кикер“ на својата интернет-страница.
За првиот стрелец на Бундес-лигата, Полјакот Роберт Левандовски, тоа значи дека во моментов е на првото место, со 60 поени од 30-те гола сезонава за лидерот на германскиот шампионат и актуелен првак Баерн (во најдобрите шест првенства головите се множат со коефициент два, во следните на таа листа со 1,5, а преостанатите со коефициент еден).
Од најсилните пет лиги во Европа (Англија, Франција, Германија, Италија и Шпанија), во моментов се игра само во германската Бундес-лига, каде што нови поени освоија Тимо Вернер од Лајпциг (сега е трет со 50 поени), Ерлинг Холанд (четврти со 44 поени) и Џејдон Санчо (11-ти со 34 поени) од Борусија Дортмунд итн.
Наскоро треба да продолжат сезоните во Англија, Шпанија и во Италија, а во Франција е прогласен крај на сезоната. Осум фудбалери од врвот на ранг-листата за „златната копачка“ сезонава играат во некое од најсилните пет првенства во Европа. Наградата во претходните три сезони ја освои Лионел Меси од Барселона.
