Украина работи на одржување средба меѓу претседателот Володимир Зеленски и американскиот претседател Доналд Трамп, потврди Зеленски по говорот на Светскиот економски форум во кој ги повика европските лидери да направат повеќе за одбрана на континентот.
-Екипите се ангажирани за договарање на состанок. Процесот е во тек – изјави во Давос украинскиот претседател Володимир Зеленски.
Доналд Трамп, кој вчера положи заклетва како 47-ми американски претседател, рече дека брзо ќе стави крај на војната во Украина.
Зеленски предвидува дека рускиот претседател Владимир Путин би можел да бара Украина драстично да ги намали своите вооружени сили, на една петтина од нејзиниот сегашен капацитет, но дека Украина нема да се согласи на тоа.
-Тоа го сака. Нема да дозволиме тоа да се случи – рече Зеленски.
Во Давос тој истакна дека Европа мора да се направи силен глобален играч кој ќе може да гарантира мир и безбедност за себе и за другите. Тој смета дека Европа има незабележливо влијание врз Вашингтон бидејќи САД сметаат дека придонесот на нивните сојузници за заедничката безбедност е недоволен.
-Дали некој во САД се грижи дека Европа еден ден може да ги напушти и да престане да биде нивен сојузник? Одговорот е „не“ – рече Зеленски.
Украинскиот претседател повика Европа да се обедини во однос на одбраната и безбедноста. „Ни треба обединета европска безбедносна и одбранбена политика“, рече тој.
Тој додаде дека Европа мора да знае како да се брани и повеќе да не зависи од САД.
Тој во својот говор рече и дека се прашува какви се намерите на Трамп во однос на поддршката за НАТО.
-Дали претседателот Трамп ќе обрне внимание на Европа? Дали Трамп смета дека НАТО е неопходен? Дали ќе ги почитуваат европските институции? – праша Зеленски и ги нарече САД незаменлив сојузник.
