Ретко прво американско издание на „Да се убие птицата подбивница“ од Харпер Ли е пронајдено меѓу книгите донирани во книжарницата на „Оксфам“ во Лондон. Копијата од 1960 година беше преземена од Британската библиотека, каде што ќе стане дел од националната колекција. Книгата била во кутија со американски книги што некој ја донирал во книжарницата на Портобело Роуд во западен Лондон. Нејзината вредност ја препознала менаџерката на книжарницата, Оливија Хејсман-Вокер, која вели дека ретката копија лесно можела да помине незабележано.
– Имаше многу донирани книги за разгледување, но ние го препознавме насловот „Да се убие птицата подбивница“ и сметавме дека вреди да се погледне подетално. Многу брзо сфативме дека имаме нешто навистина посебно. Заштитната фолија беше оштетена околу рабовите, но страниците беа во одлична состојба – вели таа.
Романот на Харпер Ли, „Да се убие птицата подбивница“, добитничка на Пулицерова награда, го следи адвокатот Атикус Финч додека го брани Том Робинсон, црнец неправедно обвинет за силување бела жена. Приказната за расната неправда и детската невиност се одвива во Алабама во 1930-тите. Книгата е продадена во повеќе од 40 милиони примероци низ светот и е преведена на 40 јазици. Харпер Ли, добитник на американскиот претседателски медал за слобода, почина во 2016 година на 89-годишна возраст.
