Спроведувањето на договорот за Регионално сеопфатно економско партнерство (РЦЕП) ги потврдува напорите на Кина да го прошири отворањето на нејзината економија, со што би се динамизирал развојот на глобалниот пазар, а бенефиции би имале компаниите во целиот свет
Стапи во сила договор од областа на економијата што опфаќа третина од светското население
Градежната компанија ЦЦСБИЕ со седиште во Пекинг е само една од многуте кинески компании што не го криеја своето задоволство од отворањето на перспективите со отпочнувањето на договорот за Регионално сеопфатно економско партнерство (РЦЕП), што претставува влез во „најголемиот светски блок за слободна трговија“. Споменатиот договор стапи во сила кај 11 од 15-те земји-потписнички. Веќе се потпишани градежни договори во вредност од вкупно 361 милион долари во регионот, вклучувајќи и некои во Виетнам, Малезија, Камбоџа и во Филипини.
– Со спроведувањето на договорот РЦЕП, нашите трошоци за материјали, опрема и машини ќе бидат значително намалени поради укинувањето и намалувањето на царините – истакна Јанг Ченгхуи, генерален директор на филијала на гореспоменатата градежна компанија ЦЦСБИЕ, лоцирана во Југоисточна Азија.
Јанг верува дека кинеските претпријатија се конкурентни во градежништвото и во сродните индустрии, па затоа имаат зголемено присуство на пазарите во Југоисточна Азија, поради олеснувањето на пазарните ограничувања во рамките на РЦЕП. Ставовите на Јанг одекнаа и кај аналитичарите и деловните лидери, кои рекоа дека спроведувањето на договорот ќе отвори повеќе пазарни можности за претприемачите, како дома така и надвор, благодарение на забрзаната регионална пазарна интеграција во најголемиот светски блок за слободна трговија.
Договорот значи олеснување на соработката на земјите што чинат една третина од светскиот БДП
Потписничките на договорот за Регионално сеопфатно економско партнерство (РЦЕП) сочинуваат речиси една третина од светското население и околу една третина од светскиот БДП. Спроведувањето на трговскиот договор, кој е пресвртница во напорите на Кина за проширување на сеопфатното отворање на економијата на високо ниво, исто така ќе акумулира вредни искуства за нацијата да ги усогласи домашните регулативи со меѓународните економски и трговски правила за високи стандарди, за да ги исполни своите цели од проширувањето на пазарот. Инициран од Асоцијацијата на нациите од Југоисточна Азија во 2011 година, РЦЕП беше потпишан во ноември 2020 година од страна на Кина, Јапонија, Јужна Кореја, Нов Зеланд, Австралија и сите 10 земји-членки на АСЕАН. На 1 јануари, пактот стапи во сила во Кина, Јапонија, Австралија, Нов Зеланд и во шест држави од АСЕАН (Брунеи, Камбоџа, Лаос, Сингапур, Тајланд и Виетнам). Подоцна на 1 февруари стапи во сила во Јужна Кореја, а во Малезија од 18 март.
– Договорот РЦЕП ја покажува желбата на Кина да се интегрира во светската економија и дополнително да се отвори кон надворешниот свет – рече Џу Тиан, програмски директор на ЕМБА во Меѓународната бизнис-школа Кина – Европа во Шангај.
Создавајќи унифициран систем на правила во регионот, договорот за слободна трговија им помага на странските инвеститори да добијат пристап до цел регион кога пристапуваат до една земја со пошироки пазари, пониски оперативни трошоци и полесни надворешни инвестиции, вели Џу.
Ванг Јиминг, заменик-претседател на Кинескиот центар за меѓународна економска размена, го истакна значењето на царинските отстапки на трговскиот договор, неговите кумулативни правила за потекло и извонредното подобрување во либерализацијата и олеснувањето на трговијата и инвестициите. Договорот на крајот ќе укине 90 отсто од царините за стоките што се тргуваат во регионот. Исто така, им овозможува на производите да уживаат во отстранувањето и намалувањето на тарифите сѐ додека имаат 40 отсто од вкупната вредност што треба да се додаде во регионот. Тоа во голема мера ќе ги подобри слободните текови на производи, капитал и информации меѓу членовите на РЦЕП за да формираат посилни регионални економски врски и поотпорни регионални индустриски и снабдувачки синџири, рече Ванг.
Според Хуо Џиангуо, потпретседател на Кинеското друштво за студии на Светската трговска организација, отворањето на Кина на високо ниво ќе тече побрзо врз основа на нејзините домашни приспособувања за целосно исполнување на обврските РЦЕП. Тоа, исто така, ќе го олесни стремежот на нацијата да се приклучи на Сеопфатниот и прогресивен договор за транспацифичко партнерство, трговскиот договор на 11 нации со уште повисоки стандарди за трговски правила и пристап на пазарот во споредба со договорот РЦЕП.
Според министерството за трговија, Кина има преземено највисоко ниво на обврски за отвореност за трговија со услуги како дел од РЦЕП, меѓу сите договори за слободна трговија што ги потпиша. Инаку, државата има потпишано 19 вакви договори со 26 економии. Кина вети дека ќе отвори уште 22 сегменти во услужниот сектор, како грижа за постари лица, професионален дизајн, менаџмент и консалтинг, производствени услуги, спорт и забава и истражување на пазарот, покрај нејзината посветеност да отвори 100 потсектори во девет индустрии за да ѝ се приклучи на Светската трговска организација. Исто така, има преземено обврски за отвореност на повисоко ниво за 37 потсектори на услуги, вклучувајќи правни услуги, градежништво и инженерство, осигурување, банкарство, хартии од вредност, океански транспорт и сродни услуги, превод и толкување и рекламирање.
Царински олеснувања за трговската размена во рамките на договорот РЦЕП
Од кинескиот Центар за меѓународна економска размена потврдуваат дека забрзаното отворање на професионални услуги за производители во регионот опфатен со РЦЕП, како што се истражувањето и развојот, професионалниот дизајн и информатичките услуги, ќе внесе поголем поттик за соработка за секторите, како што се дигиталната економија, фармацевтските производи, здравството и новите видови енергија. Оттаму потврдија дека со пошироките и сеопфатни експертски анализи се заклучува дека зголемената потрошувачка и увозот на Кина ќе создадат подобри услови за другите економии членки на РЦЕП да го зголемат извозот, како и да помогнат во подобрувањето на регионалната економска и трговска соработка.
Според кинеското министерство за трговија, царините за повеќе од 65 отсто од кинеските стоки што се тргуваат со Австралија, Нов Зеланд и во земјите од АСЕАН требаше да бидат укинати веднаш по стапувањето на договорот во сила. Кина вети укинување на царините за низа производи од АСЕАН, вклучувајќи и некои хемиски производи, производи од хартија, дизел-мотори и некои автоделови, освен ставките вклучени во Договорот за слободна трговија меѓу Кина и АСЕАН.
Формирајќи директни односи за слободна трговија со Јапонија за првпат, Кина ги отстрани царините за 25 отсто од јапонскиот извоз во Кина на 1 јануари, додека 57 отсто од кинескиот извоз во Јапонија сега е без царини. Помеѓу двата народа за првпат се договорени и царински отстапки за земјоделските производи.
Со Јужна Кореја, Кина вети царински отстапки и укинување на увозот на стоки, како што се текстилни производи и не’рѓосувачки челик, додека Јужна Кореја презеде царински обврски за кинеските производи како што се еленски рогови и декстрин, освен артиклите што се веќе вклучени во нивните билатерални договори за слободна трговија.
