Продолжуваат шаховските возбудувања, почна „Опен Скопје 2024“

По успешното завршување на Европското првенство во забрзан, брз и во Фишеров шах, до 17 декември ќе трае традиционалниот меѓународен турнир „Опен Скопје 2024“ во класичен шах, кој е поделен на турнири А и Б

Со свеченото отворање и одигрувањето на првото коло од предвидените девет на традиционалниот меѓународен турнир „Опен Скопје 2024“, продолжуваат деновите на шахот во Македонија. По успешното завршување на Европското првенство во забрзан, брз и во Фишеров шах, до 17 декември ќе трае овој турнир во класичен шах (90 минути плус 30 секунди по секој потег), кој е поделен на турнири А и Б. На А-турнирот има 97 учесници (11 ВМ, три ЖВМ, пет ИМ, еден ЖИМ, осум ФМ, 2 ЖФМ) од 16 земји. Прворангиран, како и лани, е ВМ од Азербејџан Елтај Сафарли (2.610), а од Македонија ИМ Никола Николовски (2.407, 11-ти). Кај шахистките тоа е ФМ од Грција Анастасија Аврамидоу (2.298, 19-та), а Македонка е ЖФМ Ивана Манова (2.059, 43-та).
На турнирот Б (рејтинг до 2.000 поени) има вкупно 136 учесници (по еден ИМ и ЖФМ) од девет држави. Прворангирана е ЖФМ од Русија Елена Димитрова (1.998), македонски претставници се младиот Стефан Мелник (1.937, петти) и Инџи Ајрадиноска (1.805, 30-та). Наградниот фонд на турнирот А е 7.400 евра (за победникот 2.000), а на турнирот Б 2.900 (за првакот 600 евра). Партиите почнуваат од 17 часот (утре и задутре ќе се играат по две кола).
Лани на турнирот А меѓу 128 учесници од 20 држави (14 ВМ, еден ЖВМ), победи македонскиот ВМ Евгени Романов, кој тогаш уште ги бранеше боите на Норвешка, со 7,5 поени, а најуспешен Македонец беше Николовски, кој со 5,5 поени беше на 22-то место. Кај шахистките најдобра беше ЖИМ Триша Канјамарала од Ирска со 5,5 поени (вкупно 29-та), а од Македонија Манова, која со 4,5 поени беше 73-та. На турнирот Б имаше 169 учесници од 13 земји, победи Фахрудин Халиловиќ од БиХ со осум поени, а најдобар Македонец беше Зоран Костадиновски (седум поени, петти). Кај шахистките прва беше Кристила Роусеау од Белгија со шест поени (вкупно 23-та), а македонска претставничка Еф­товска, која со 5,5 поени вкупно беше на 38-то место. Г.И.

Победници на неколку  претходни турнири