АТЛЕТИКА
Дијамантската лига во атлетика ќе ја зголеми својата парична награда на повеќе од девет милиони долари во 2025 година, што ќе претставува највисока награда во историјата на оваа серија, соопштија организаторите. Вклучувајќи ги промотивните суми за врвни спортисти, вкупно околу 18 милиони долари ќе им бидат исплатени на спортистите во текот на сезоната во 2025 година, при што многу повеќе милиони ќе бидат инвестирани во услуги за спортистите, како што се патување и транспорт, сместување и медицинска и физиотерапија. Атлетичарите и атлетичарките ќе бидат платени по иста стапка.
Новиот вкупен износ е речиси една третина повисок од сумата за време на периодот погоден од пандемијата од 2021 до 2024 година, се наведува во соопштението на Дијамантската лига.
Секој од 14-те митинзи во Дијамантската лига од регуларната сезона во 2025 година ќе додели вкупна наградна сума од 500.000 долари, а финалето во август ќе понуди 2,24 милиони долари. Вкупната наградна сума по дисциплина ќе биде помеѓу 30.000 и 50.000 долари, а во финалето помеѓу 60.000 и 100.000 долари, се додава во соопштението.
Сезоната на Дијамантската лига годинава заврши во Брисел во минатата недела, а Цирих ќе биде домаќин на финалето во 2025 година. Г.И.
