Светот е сцена
Египетските власти го објавија откривањето на гробницата на фараонот Тутмос Втори, последната од изгубените гробници на кралевите од Осумнаесеттата династија на Древниот Египет, која владеела повеќе од два века помеѓу 1550 година пр. н.е. и 1292 пр. н.е. Тоа е првата фараонска египетска гробница што е откриена откако последното почивалиште на фараонот Тутанкамон беше пронајдено во 1922 година.
Заедничката египетско-британска археолошка мисија ја откри гробницата на Тутмос Втори во областа на планината Теба, западно од Луксор и познатата Долина на Кралевите. Тимот и египетското Министерство за туризам и антиквитети, кои го објавија ова, соопштија дека за време на ископувањето на она што претходно беше познато само како гробница бр. C4., откриени се докази што јасно укажуваат дека ова е гробницата на фараонот Тутмос Втори.
Д-р Мохамед Исмаил Калед, генерален секретар на Врховниот совет за антиквитети на Египет, рече дека кога првпат ги пронашле влезот на гробницата и нејзиниот главен премин пред речиси три години, тимот верувал дека може да припаѓа на една од жените на фараонот, со оглед на нејзината близина до гробницата на сопругите на фараонот Тутмос Трети и близината на гробот на кралицата Хатшепсут. Како што продолжија ископувањата и испитувањето на артефактите, пронашле нови докази што го идентификуваат сопственикот на мистериозната гробница – фараонот Тутмос Втори. Исто така се сугерира дека неговите погребни ритуали ги извршила кралицата Хатшепсут, која била негова сопруга и полусестра.
Калед рече дека фрагменти од алабастерски садови пронајдени во урнатините имаат натписи со името на фараонот Тутмос Втори и го идентификуваат како „покоен фараон“, заедно со името на неговата сопруга Хатшепсут. Сето ова, додаде Калед, помогнало да се потврди дека Тутмос Втори е сопственик на гробницата.
Тој го опиша откритието како едно од најважните археолошки откритија во последните години. Откриените артефакти се важен придонес за научното разбирање на историјата на областа и владеењето на кралот Тутмос Втори.
Мумијата на фараонот е откриена во текот на 19 век на друг археолошки локалитет познат како Кашета Деир ел Бахари, каде што најверојатно бил преместен неколку века откако бил ограбен од разбојници на гробници, според релативно новиот Национален музеј на египетската цивилизација. Неговата мумија сега е изложена во музеј, меѓу оние на други древни фараонски семејства.
Гробницата е во лоша состојба главно поради изложеноста на поплави кратко време по смртта на Тутмос Втори, според Мохамед Абдел Бади, раководител на секторот за египетски антиквитети при Врховниот совет за антиквитети и водач на египетскиот тим што работеше на ископувањето. Абдел Бади рече дека првичните студии, исто така, покажуваат дека голем дел од оригиналната содржина на гробницата била преместена на друга локација по античките поплави.
Д-р Пирс Литерланд, водач на англискиот тим на локацијата, рече дека гробницата се карактеризира со едноставен архитектонски дизајн, како што го избрале владетелите на Египет што дошле по Тутмос Втори. Литерленд рече дека мисијата ќе продолжи со својата истражувачка работа и ќе се обиде да утврди каде исчезнала остатокот од содржината на гробот на Тутмос Втори и дали гробот крие и други тајни.
