Пожар избил денеска на територијата на Општина Градско, во атарот меѓу селата Горно Чичево и Долно Чичево, а поради брзото ширење на огнот биле пренасочени и ер-тракторите кои интервенирале на пожарот на планината Китка, информира директорот на Дирекцијата за заштита и спасување (ДЗС), Стојанче Ангелов, пренесе МИА.
Според Ангелов, пожарот избил околу 11 часот, најверојатно на стрниште, но поради високата и сува трева и силниот ветер брзо се проширил и претставувал опасност за двете села.
По барање на градоначалникот на Градско, веднаш биле испратени противпожарни екипи од Велес, Неготино и Кавадарци. Сепак, поради брзината со која се ширел пожарот, било проценето дека се потребни дополнителни сили.
-Ги пренасочив ер-тракторите, кои од рано утрово дејствуваа на големиот пожар на планината Китка. Тие помогнаа во почетното ставање под контрола на пожарот, а веднаш потоа продолжи со дејство и полицискиот хеликоптер – изјави Ангелов.
Во гаснењето се вклучиле и жители од околните населени места, кои со трактори помогнале во изработката на противпожарни пресеки за да се спречи понатамошното ширење на огнот.
Ангелов изрази благодарност до локалното население и посочи дека очекува пожарот наскоро да биде целосно изгаснат.
