Јан Фигел е влијателен политичар од Словачка, кој бил поранешен еврокомесар и специјален пратеник за човекови права надвор од ЕУ
Јан Фигел специјално за „Нова Македонија“:
Собранието во Скопје треба да побара политички гаранции за непречен интегративен процес во врска со уставниот амандман. Во овој поглед, Европскиот совет (ЕС) мора да ги покаже својата зрелост и правичност. Историјата е најдобриот учител, но историјата треба да се прифати во светлината на вистината. Истражувањето на чувствителните делови од историјата бара научна стручност и академска независност.
Европската интеграција се однесува на учеството на граѓаните и заедничките вредности. Затоа препорачувам луѓето од Македонија да бидат фер вклучени од почеток до успешното пристапување во ЕУ. Ова е двојна цел – важно и за Македонија и за ЕУ, вклучувајќи и за Бугарија. Земјата чекаше веќе 17 години, премногу долго. Подобро е подготвена за преговорите со ЕУ отколку некои преговарачки земји!
Со длабока загриженост ја следев блокадата на македонското отворање на преговорите за пристап во ЕУ од страна на Бугарија. Словачката дипломатија и официјално се спротивстави на овој бугарски потег. За жал, ситуацијата го потврдува старото искуство дека Балканот е подобар во производството на историјата отколку во апсорпцијата. Бугарските барања носат штетна тензија и опасност од национализам во проширувањето на ЕУ. Ако ова не се реши правично од страна на Европскиот совет, тоа може да ги наруши кредибилитетот на ЕУ и идните проширувања.
Пристапните преговори на Словачка траеја 34 месеци и граѓаните го одобрија овој влез на референдум бидејќи процесот беше транспарентен и конструктивен. Ја одведе нацијата и во шенген и во еврозоната. Од клучно значење е населението да биде информирано и да го поддржува, инаку целиот процес може да стане проблематичен или неуспешен. Барањето за ревизија на историјата или идентитарната политика им наштетува на меѓусоседските односи и ја намалува довербата во европскиот проект.
Со почит, Јан Фигел
