На денешното рочиште за пожарот во дискотеката „Пулс“ во Кочани сведочеше студентката Теа од Штип, која изјави дека пиротехничките средства биле поставени вечерта, откако таа пристигнала во локалот околу 1 часот по полноќ заедно со пријатели, пренесе МИА.
Таа посочи дека нивната маса била поставена непосредно пред бендот и блиску до сцената, а во текот на вечерта забележала дека пиротехниката е поставена премногу блиску до гостите, по што реагирала кај пријателка.
Додека снимала со мобилен телефон, како што рече, по околу една минута забележала искри и плафонот почнал да гори.
-Не го сфативме веднаш сериозно, но кога еден член од бендот повика да излеземе, тргнав кон излезот – сведочеше таа.
Во моментот на евакуацијата настанала голема турканица, а зад неа се слушнала експлозија. Таа наведе дека се заглавила меѓу влезната и излезната врата и почнала тешко да дише.
-Бев во лежечка положба, беспомошна. Барав помош. До мене беше пријателот кого го држев за рака – изјави сведокот, додавајќи дека обезбедувачот Стојанчо ја извлекол надвор.
Таа исто така изјави дека и претходно во дискотеката имало користење пиротехника и дека во локалот влегувала и кога била малолетна.
Пожарот во „Пулс“ избувна на 16 март 2025 година за време на настап на групата ДНК. Во трагедијата загинаа 63 лица, а над 200 беа повредени. Судењето продолжува со сослушување сведоци предложени од Обвинителството.
