Европската Унија (ЕУ) ќе ги укине царините за американските стоки до крајот на март 2025 година, кои Брисел ги воведе како реципрочна мерка на тарифите на Вашингтон за челик и алуминиум од ЕУ. Претходно и Европската комисија (ЕК) пред два дена објави дека ќе ги суспендира реципрочните мерки спроведени за време на претседателството на Трамп на 15 месеци со важност до 31 март 2025 година.
Сепак, Брисел не го убеди Вашингтон да ги подобри сегашните царински квоти за кои се применуваат давачки. Оттаму се вели дека САД мора да ја завршат сопствената процедура за продолжување на системот на тарифни квоти за истиот период од јануари. ЕУ смета дека системот на квоти, кој вклучува квартални квоти за 54 категории производи за фабрики за челик и 16 категории производи за фабрики за алуминиум, не е доволно флексибилен и има потреба од подобрувања.
Во соопштението на комисијата се вели дека ЕУ ќе продолжи конструктивно да се ангажира со САД за да ги зачува своите законски права и трајно да ги елиминира американските царини за извозот од ЕУ. Тарифите беа наметнати врз основа на дел од американскиот закон, кој му дава овластување на претседателот да воведе царини за одредени увозни причини поради национална безбедност.
Времето што го имаа ЕУ и САД да склучат глобален договор за одржлив челик и алуминиум истекува, што бара усвојување на овој компромис за тарифи. Договорот предвидува ослободувањето од царина да остане во сила до претстојните претседателски избори во САД во ноември 2024 година.
Договорот ќе обезбеди трајно решение за спорот од времето на Доналд Трамп за царините за европскиот увоз врз основа на тоа дека тие претставуваат ризик за американската национална безбедност. Блокот веднаш воведе одмазднички мерки.
ЕУ и САД постигнаа привремено примирје во 2021 година, кое истекува на крајот на оваа година.
ЕУ сака САД да ги отстранат сите тарифни квоти како дел од поширокиот договор, кој САД досега одбиваа да го потпишат. Блокот, исто така, размислува за обновување на случајот против САД во Светската трговска организација или повторно воведување на некои царини за американски производи.
Ова не е широко поддржано од земјите-членки на ЕУ, кои се загрижени за потенцијално зголемените трговски тензии пред изборите следната година. Е.Р.
