Властите во Гватемала наредија превентивна евакуација на два града во близина на вулканот Фуего, кој влезе во поинтензивна фаза на ерупција. Вулканот исфрла густ облак од пепел, вулкански гасови, саѓи и карпести фрагменти, поради што е зголемена опасноста за населението, пренесе „Гардијан“.
Наредбата за евакуација се однесува на градовите Ел Порвенир и Лас Лахитас, во регионот Сан Хуан Алотонанго. Истовремено, властите прогласија портокалова тревога и го засилија мониторингот на вулканската активност.
Според надлежните служби, доколку ерупцијата дополнително се засили, лавата би можела да достигне подалечни области, а облаците од вулканска пепел да се прошират и до 100 километри западно и северозападно од вулканот.
Вулканот Фуего се наоѓа на околу 30 километри од главниот град Гватемала Сити и важи за еден од најактивните вулкани во Централна Америка.
При неговата катастрофална ерупција во 2018 година беше уништено цело село, а животот го загубија повеќе од 200 лица.
