Корпусот на Исламската револуционерна гарда (ИРГЦ) соопшти дека извршил напад со балистички ракети врз американска воздухопловна база во Јордан, додека безбедносната состојба на Блискиот Исток продолжува да се влошува.
Во соопштението, објавено преку иранската новинска агенција „Фарс“, ИРГЦ ги повика граѓаните на Јордан да побараат затворање на американските воени бази во нивната земја.
– Не чувствуваме никакво непријателство кон вашата земја. Напротив, ве почитуваме како народ што подобро од кој било ја разбира болката и страдањето на Палестинците – се наведува во соопштението.
Јорданските власти претходно соопштија дека нивната противвоздушна одбрана пресретнала и соборила четири ирански ракети што навлегле во воздушниот простор на земјата. Според официјалните информации, нема жртви ниту материјална штета.
Во меѓувреме, Обединетите Арапски Емирати соопштија дека иранска крстосувачка ракета погодила два нивни нафтени танкери во Ормускиот Теснец. Во нападот загинал еден индиски морнар, а осум лица биле повредени.
Оман, исто така, информираше дека танкер бил погоден во близина на брегот на полуостровот Мусандам. Од бродот биле евакуирани 18 морнари, додека по тројца сè уште се трага.
Од ИРГЦ тврдат дека погодените танкери ги игнорирале предупредувањата, ги исклучиле навигациските системи и се обиделе да минат низ минирана поморска рута.
Во Кувајт, вооружените сили соопштија дека пресретнуваат непријателски цели во воздушниот простор на земјата и ги повикаа граѓаните строго да ги следат безбедносните препораки на надлежните институции.
Во исто време, иранската агенција „Фарс“ објави дека се регистрирани повеќе експлозии на островот Кешм, во близина на Ормускиот Теснец. Според истата агенција, областа Масан на островот во последните денови повеќепати била цел на американски напади.
Иранските медиуми јавуваат и дека американските сили извршиле напади врз четири локации во градот Бушер, откако претходно беа пријавени експлозии во Бандар Абас и Џогатаи.
Покраината Бушер е од особено стратешко значење, бидејќи таму се наоѓа единствената активна нуклеарна електрана во Иран.
