Проект поддржан од програмата Еразмус+ на Европската Унија
- Новите психоактивни супстанции сè поголем предизвик: Европска иницијатива нуди нови решенија за намалување на штети
Новите психоактивни супстанции (НПС) претставуваат сè посериозен предизвик за јавното здравје ширум Европа. Нивната брза појава на пазарот, постојаното менување на нивниот хемиски состав и лесната достапност преку интернет создаваат нови ризици, како за лицата кои ги употребуваат, така и за професионалците и институциите кои обезбедуваат поддршка и третман.
Станува збор за супстанции кои често се продаваат како „легални дроги“ или „етноботанички производи“, а нивната употреба е особено застапена меѓу младите луѓе, посетителите на ноќниот живот и припадниците на ранливите заедници. Поради непредвидливите ефекти и нивното често силно дејство, стручните лица предупредуваат дека традиционалните пристапи за превенција и третман не секогаш успеваат навремено да одговорат на новите трендови.
Во време кога новите супстанции се појавуваат побрзо од кога било, професионалците сè почесто се соочуваат со ситуации за кои формалното образование не секогаш нуди доволно одговори. Како да се препознае употребата на нови психоактивни супстанции? Како да се реагира навремено и соодветно? Кои пристапи навистина даваат резултати во пракса? Одговорите на овие прашања бараат континуирано учење, следење на современите трендови и пристап до проверени, научно засновани информации.
Токму затоа беше развиена европската иницијатива „NextGen Harm Reduction“ (NEHRD), која обединува организации од Романија, Србија, Португалија и во нашата земја со заедничка цел – развој на современи, иновативни и достапни решенија за намалување на штетите поврзани со употребата на нови психоактивни супстанции. Проектот „NextGen Harm Reduction“ е поддржан од Програмата Еразмус+ на Европската Унија, што дополнително ја потврдува неговата релевантност, квалитет и европска димензија.
Во нашата држава проектот го спроведува ХОПС – Опции за здрав живот Скопје, организација која повеќе од две децении работи на унапредување на здравјето, човековите права и социјалната вклученост на маргинализираните заедници преку пристап заснован на намалување на штети.
Како дел од проектот е развиена иновативна бесплатна онлајн платформа за учење, достапна на пет јазици, која содржи шест тематски модули и повеќе од дваесет дополнителни образовни ресурси. Платформата е наменета за здравствени и социјални работници, лекари, медицински сестри, психолози, фармацевти, советници, врснички едукатори, но и за идни професионалци кои сакаат да ги продлабочат своите знаења во областа на намалувањето на штети и новите психоактивни супстанции.
Преку флексибилна и бесплатна обука, достапна во секое време и од кое било место, учесниците имаат можност да стекнат современи и практични знаења, да се запознаат со најновите европски практики и да ги унапредат своите професионални компетенции. Во време на брзи промени, ваквите знаења не се само дополнителна вредност – тие се неопходни за обезбедување квалитетна и навремена поддршка.
Доколку сте здравствен или социјален работник, психолог, лекар, медицинска сестра, советник, врснички едукатор или студент кој сака да биде подготвен за предизвиците на современото време, приклучете се на „NextGen Harm Reduction“ и станете дел од новата генерација професионалци кои ги развиваат услугите врз основа на знаење, докази и почитување на човековите права.
Повеќе информации за проектот и платформата се достапни на: https://nextgenharmreduction.com/
