Антарктикот, континент познат по екстремен студ и ледени пространства, деновиве се соочува со нешто што научниците го нарекуваат алармантно. Во еден дел од замрзнатиот континент температурата надмина 15°C на почетокот на јуни, соборувајќи ги претходните зимски рекорди, што особено ги загрижи климатолозите. Во аргентинската истражувачка база Есперанца на Антарктичкиот Полуостров на 6 јуни беа измерени дури 15,4°C, што е за два степена повисоко од претходниот рекорд од 1998 година. Во исто време температурите се над нулата три недели по ред, што е речиси незамисливо за ова време од годината.
Последиците се веќе видливи на терен. Наместо вообичаената снежна покривка, во некои области се појави гола земја, а истражувачите известуваат дека мразот се топи дури и на врвовите на глечерите, кои би требало да акумулираат нов снег во ова време од годината. Дури и на 500 метри високиот врв на блискиот глечер Колинс, Луис Муњоз, чилеански глациолог, бил сведок на дожд што го топи мразот.
– Имаше директно влијание врз глечерот, кој сега треба да добие снег. Не треба да страда од аблација во ова време од годината. Тоа очигледно не е добро за глечерот – рече тој.
Научниците предупредуваат дека ваквите топлотни бранови не се само краткорочна метеоролошка аномалија. Студијата ги моделира најдобрите и најлошите можни сценарија за глобално затоплување на Антарктичкиот Полуостров, најсеверниот дел од континентот. Во најлош случај, покриеноста со морски мраз би можела да се намали за 20 проценти. Сè почестите екстреми на Антарктикот дополнително ги зголемуваат стравувањата дека климатските промени би можеле да го забрзаат топењето на мразот, да го покачат нивото на морето и да ги нарушат кревките поларни екосистеми од кои зависат многу видови, од пингвини до китови.
