Граѓаните треба да добијат можност директно да инвестираат во големи енергетски проекти, наместо своите заштеди исклучиво да ги вложуваат во недвижности, смета претседателот на Регулаторната комисија за енергетика, водни услуги и услуги за управување со комунален отпад (РКЕ), Ацо Ристов, пренесе МИА.
Говорејќи на тркалезната маса „Зајакнување на конкурентноста – Енергетската транзиција, CBAM и иднината на македонската индустрија“, организирана од Фајнанс Тинк, Ристов предложи граѓаните да можат да учествуваат во финансирањето на изградбата на хидроелектраната Чебрен преку модел на акционерско друштво.
– Енергетиката не е привилегија само на државата, туку можност за сите. При реализација на стратешките објекти, освен класичното кредитирање, треба да се разгледа и можноста за воспоставување модел на акционерско друштво каде граѓаните ќе можат да бидат дел од проектот и да инвестираат во акции – истакна Ристов.
Тој оцени дека енергетската транзиција веќе е реалност и ја поздрави најавата на ЕСМ за изградба на когенеративна централа во Битола, оценувајќи ја како јасен чекор кон постепено намалување на зависноста од фосилните горива.
Ристов посочи дека следниот важен предизвик е развојот на електричната мобилност. Според него, додека во многу развиени земји уделот на е-мобилноста надминува 50 проценти, во Македонија тој изнесува околу еден процент.
– Тоа е област на која мора сериозно да се работи, бидејќи претставува иднината на транспортот. Како регулатор веќе подготвуваме регулатива што ќе создаде услови за побрз развој на е-мобилноста – рече Ристов.
Осврнувајќи се на јаглеродната такса и европските механизми за декарбонизација, тој нагласи дека домашниот енергетски сектор ќе мора да направи јасна разлика меѓу производството од обновливи извори и производството базирано на фосилни горива, со цел да остане конкурентен на европскиот пазар
