Извештаи на „Евростат“ и Државниот завод за статистика
- Владата, повикувајќи се на извештаите и анализите на „Евростат“ и Државниот завод за статистика, ги посочува позитивните движења во делот од економскиот раст според повеќе клучни макроекономски показатели, како што се индустријата и новите работни места како клучни двигатели на развојот македонската економија во првите месеци од 2026 година
Податоците на „Евростат“ и Државниот завод за статистика (ДЗС) ја позиционираат Македонија меѓу првите пет европски држави според растот на бруто-домашниот производ (БДП), додека истовремено се бележат пораст на индустриското производство и отворање нови работни места. Овие показатели беа во фокусот на обраќањето на премиерот Христијан Мицкоски, кој оцени дека економијата се движи во позитивна насока и дека земјата успева да остварува резултати и покрај сложените глобални економски околности.
Македонија меѓу водечките економии по растот на БДП
Според најновите статистички податоци, БДП на Македонија во првото тримесечје од 2026 година пораснал за 3,1 отсто во споредба со истиот период лани. Со овој резултат земјата се наоѓа меѓу петте најуспешни европски економии според динамиката на раст.
Премиерот Мицкоски посочи дека веднаш зад Малта, Полска и Србија се наоѓа Македонија, што, според него, претставува значајно достигнување во услови на неизвесна меѓународна економска средина.
– Македонија забрзува и државата мора да оди напред. Со скромни ресурси покажуваме дека можеме да направиме многу – изјави Мицкоски.
Дополнителна тежина на овие показатели им дава фактот што земјата бележи седум последователни квартали на економски раст. Тоа, според анализите, ја сместува Македонија во горната половина на европските економии според стабилноста на економските перформанси.
Градежништвото и услугите меѓу главните носители на растот
Структурата на економскиот раст покажува дека најголем придонес имаат неколку дејности што во изминатиот период бележат значителна експанзија. Највисок раст е регистриран во секторот градежништво, каде што активноста е зголемена за 7,2 проценти. Овој резултат упатува на засилени инвестиции и поголема динамика во изградбата на инфраструктурни и приватни проекти.
Висок раст од 6,1 отсто е забележан и кај стручните, научните и техничките дејности, како и административните и помошните услужни активности. Овие области се сметаат за важен показател за модернизацијата на економијата и зголемувањето на додадената вредност во стопанството.
Индустријата повторно во позитивна зона
Вториот економски столб што го издвојува Владата од статистичките показатели на извештаите од специјализираните институции е индустриското производство. Според официјалните податоци, во април 2026 година индустриското производство пораснало за 7,6 проценти во споредба со истиот месец минатата година.
Иако кумулативниот раст во првите четири месеци од годината изнесува 0,2 проценти, економските аналитичари посочуваат дека задржувањето во позитивна зона има особено значење во услови на нестабилни глобални пазари и високи енергетски трошоци.
Мицкоски нагласи дека ваквите резултати се постигнуваат во период на сериозни предизвици на светските енергетски пазари.
– Ова доаѓа во услови на најголема енергетска криза, поголема дури и од кризите во 1970-тите години и онаа од 2022 година – рече премиерот.
Според Владата, растот на индустријата е важен показател за одржување на производствениот капацитет и конкурентноста на домашната економија.
И пазарот на трудот носи нови позитивни сигнали
Третиот клучен индикатор што го потенцира премиерот е вработеноста. Според официјалните податоци, во март 2026 година во земјата биле регистрирани 707.385 вработени лица.
За споредба, во јуни 2024 година бројот на вработени изнесувал 691.736 лица. Тоа значи дека за помалку од две години биле отворени приближно 16.000 нови работни места. Овој тренд, според Владата, укажува на постепено зајакнување на пазарот на трудот и создавање услови за повисока економска активност.
– Нашата цел е силна, стабилна и конкурентна економија, која создава нови работни места, повисоки плати и подобар животен стандард – истакна Мицкоски.
Економски резултати во време на глобални кризи
Владата оценува дека постигнатите показатели имаат дополнителна тежина ако се земат предвид глобалните економски и политички предизвици со кои се соочуваат европските економии. Во такви услови, одржувањето континуиран раст на БДП, позитивни индустриски резултати и зголемена вработеност се претставуваат како доказ за стабилизирање на економските текови во земјата.
Премиерот нагласува дека останува фокусот на решавање на наследените финансиски проблеми, сервисирање на долговите и справување со последиците од меѓународните енергетски и економски потреси.
Три показатели што ја дефинираат економската слика
Ако се сумираат најновите статистички податоци, економската слика за Македонија во моментов се темели на три главни показатели:
Прво, раст на БДП од 3,1 отсто и позиционирање меѓу водечките европски земји по економски раст, второ, зголемување на индустриското производство за 7,6 проценти во април и, трето, отворање околу 16.000 нови работни места во период пократок од две години.
Токму овие три сегменти – економскиот раст, индустриската активност и вработеноста – Владата ги претставува како основни столбови на актуелниот развоен циклус и како показатели преку кои ќе се оценува успешноста на економските политики во наредниот период. Е.Р.
