Третото коло на Турнирите на кандидатите за светски првак во Пафос (Кипар) и во машка и во женска конкуренција донесе возбудлив шах и четири победи. На машкиот турнир, Американецот Фабијано Каруана освои цел поен против Кинезот Ји Веи во минијатурна партија по само 19 потези, откако успеа да го зароби неговиот ловец.
Втората победа ја забележа Узбекистанецот Јавокир Синдаров против Индиецот Прагнананда Рамешбабу, откако жртвуваше фигура во самото отворање. Токму Синдаров и Каруана играат денеска попладне во 4. коло, по што утре ќе следува првиот слободен ден. Другите две партии меѓу Американецот Хикару Накамура и Холанѓанецот Аниш Гири, односно Германецот Матијас Блубаум и Русинот Андреј Есипенко завршија со реми.
На женскиот турнир, Русинката Катерина Лагно во прекрасна партија ја надигра Тан Жонгји од Кина, а нејзината сонародничка Жу Џинер во сложена партија ја пропушти својата шанса против Казахстанката Бибисара Асаубаева, која, пак, со директна и енергична контраигра освои цел поен. Партиите меѓу Индијката Ваишали Рамешбабу и Украинката Ана Музичук, односно Русинката Александра Горјачкина и Индијката Дивја Дешмух завршија мирољубиво.
Табела, мажи: Синдаров (2.745 рејтинг-поени) и Каруана (2.795) по два поена, Рамешбабу (2.741) и Блубаум (2.698) по 1,5, Веи (2.754), Гири (2.753), Накамура (2.810) и Есипенко (2.698) сите со по еден поен.
Табела, жени: Асаубаева (2.616) и Лагно (2.556) по два поена, Горјачкина (2.534), Рамешбабу (2.470), Музичук (2.522) и Дешмух (2.497), сите со по 1,5, Жонгји (2.535) и Џинер (2.578) со по еден поен.
Г.И.
