Книгоиздателството „Макавеј“ го објави новиот роман на Жан Илиески, насловен „Баба Илка“. Ова дело претставува емотивно патување низ ходниците на сеќавањето, каде што детската љубопитност се среќава со суровата реалност на животот.
Низ призмата на три летни распусти на едно седумгодишно момче и неговата сестра кај нивната баба во Прилеп, авторот Жан Илиески ја отсликува атмосферата на едно минато време – исполнето со мирис на сушен тутун, звуци на фудбалски радиопреноси и топлина на едноставните, но длабоки човечки врски. Во центарот на оваа приказна е баба Илка, тивка хероина чиј секојдневен труд и пожртвуваност го обликуваат светот на нејзините внуци. Прилеп е македонското Макондо, Илка е женската Зорба.
Уредникот на изданието, Владимир Цветкоски, оценува дека „Баба Илка“ е приказна за созревањето, за спознавањето на светот и страдањето. Сето тоа е во сенката на една впечатлива женска фигура.
Авторот Жан Илиески вешто ги користи автентичниот прилепски дијалект и колоквијалниот говор за да постигне уметнички убедлив израз, спасувајќи ги од заборав ликовите и времињата што полека исчезнуваат во подземната кал на заборавот.
Промоцијата на романот „Баба Илка“ ќе се одржи на 17 март, со почеток во 19 часот, во „Салон 19-19“ во Културно-информативниот центар (КИЦ
Скопје). Модератор на настанот ќе биде Ана Јовковска. Издавачот „Макавеј“ ги кани сите љубители на пишаниот збор да се придружат во чествувањето на новото книжевно остварување на Жан Илиески.
