Американскиот претседател Доналд Трамп изјави дека не е загрижен поради порастот на цените на бензинот во САД, кој се случи по ескалацијата на конфликтот со Иран.
Во интервју за Ројтерс, Трамп нагласи дека евентуалното поскапување на горивата е помал проблем во споредба со пошироката безбедносна ситуација.
– Немам никакви загрижености за тоа. Цените ќе паднат многу брзо кога ќе заврши ова. А ако се зголемат, нека се зголемат – ова е многу поважно од мало зголемување на цената на бензинот – изјави Трамп.
Според податоците, цената на бензинот во САД се зголемила за околу 20 центи по галон, што претставува раст од приближно седум проценти во само неколку дена по почетокот на конфликтот.
Трамп додаде дека во моментов нема планови за користење на Националните стратешки резерви на нафта, кои се најголемите резерви за итни случаи во светот и се складирани во подземни складишта во Луизијана и Тексас.
Тој изрази уверување и дека Ормутскиот теснец ќе остане отворен за пловидба, посочувајќи дека иранската морнарица е значително ослабена.
Изјавата на Трамп доаѓа повеќе од една недела откако тој во обраќање пред нацијата го пофали намалувањето на цените на горивата во САД.
