Извештајот заклучува дека нашата држава „задоволително имплементирала 17 од 23-те препораки дадени во петтата рунда на евалуација“…
ГРЕКО ја затвора постапката за т.н. усогласување и го поздравува напредокот во антикорупциските реформи во централната власт и полицијата во Македонија
Во извештај објавен во Стразбур, Групата на држави против корупција на Советот на Европа (ГРЕКО) ја затвори својата постапка за усогласување за Македонија во петтата рунда на евалуација, земајќи го предвид напредокот на земјата во спроведувањето на нејзините препораки насочени кон спречување на корупцијата во највисоките извршни функции на централната влада и полицијата.
Извештајот заклучува дека нашата држава „задоволително имплементирала 17 од 23-те препораки дадени во петтата рунда на евалуација, усвоени во 2019 година. Шест препораки остануваат делумно имплементирани.
ГРЕКО ги поздравува мерките преземени за зајакнување на транспарентноста и промовирање на интегритетот на лицата што имаат високи извршни позиции. Новиот правилник за работа на Владата сега овозможува јавен пристап преку интернет до списокот на лица поканети или присутни на владини поткомитети и работни групи. Усвоени се нови упатства за декларирање и обработка на подароци, а во моментов се развива и онлајн каталог со детали за овие подароци.
Подготовка и имплементирање на низа препораки, претходно утврдени како неопходни
Друг позитивен развој е создавањето електронска база на податоци за евидентирање и проверка на анкетните листови за имотот на избраните или именуваните јавни службеници, иако таа сè уште не е целосно оперативна. Се очекува нацрт-измените на Законот за спречување корупција и судир на интереси, насочени кон зајакнување на режимот на санкции, да бидат усвоени до крајот на 2025 година.
Исто така, беше спроведена анализа за процена на процесите и практиките на Одделот за надзор на имотот на Државната комисија за спречување корупција. Сепак, спроведувањето на добиените препораки останува во тек и ќе бара континуирано следење и ангажман за да се обезбедат конкретни подобрувања.
Во однос на спроведувањето на законот, ГРЕКО, исто така, забележува напредок, особено во законската реформа насочена кон зајакнување на оперативната независност на полицијата и нејзините механизми за внатрешен и надворешен надзор. Сепак, потребни се дополнителни напори за да се обезбедат објективни и транспарентни процени и да се зајакне заштитата на дојавувачите.
На македонските власти им се препорачува да го информираат ГРЕКО за секој понатамошен напредок во врска со целосното спроведување на преостанатите препораки. ГРЕКО особено очекува ажурирања за воспоставувањето на регистарот на подароци, целосната имплементација на електронската база на податоци за анкетни листови за имотна состојба на избрани и именувани функционери, подобрувања на режимот на санкции за прекршување на правилата за судир на интереси, интегритет и антикорупција, измени на процедурите за тестирање на интегритетот во рамките на полицијата, вклучително и нивната евалуација, и практичната имплементација на законодавството за заштита на дојавувачите во полициските сили.
ГРЕКО: Да се продолжи со динамиката за спроведување на препораките со ист
ентузијазам
Во согласност со правилото 31, ревидиран bis, став 10 од Деловникот за работа на ГРЕКО, усвојувањето на овој адендум на вториот извештај за усогласеност ја затвора постапката за усогласеност во рамките на петтиот круг на евалуација во однос на Македонија. Меѓутоа, властите на Македонија сепак можат да го информираат ГРЕКО за развојот на настаните во врска со спроведувањето на препораките vii, viii, ix, xv, xvii и xxii, кои остануваат нецелосно спроведени.
ГРЕКО ги повикува надлежните власти во нашата држава да го одобрат, што е можно поскоро, објавувањето на овој извештај, да го преведат на националниот јазик и да го објават преводот.
Групата на држави против корупција (ГРЕКО) е тело на Советот на Европа, кое има цел да го подобри капацитетот на своите членови за борба против корупцијата преку обезбедување нивно почитување на стандардите за антикорупција. Им помага на државите да идентификуваат недостатоци во националните политики за антикорупција и ги охрабрува да ги преземат потребните законски, институционални и практични реформи. Моментално ги обединува 46-те земји членки на Советот на Европа, Казахстан и на Соединетите Американски Држави.
Тони Гламчевски, наш постојан дописник од Франција
Кусо за ГРЕКО
Група држави против корупцијата во Советот на Европа
Групата држави против корупцијата (ГРЕКО) е тело за следење на (анти)корупцијата на Советот на Европа со седиште во Стразбур. Воспоставен е во 1999 година како проширен делумен договор од 17 земји членки на Советот на Европа. ГРЕКО, кој е отворен и за неевропски држави, моментално има 50 членки (48 европски држави, Казахстан и Соединетите Американски Држави). Од август 2010 година, сите членки на Советот на Европа се членови на ГРЕКО. Членството во ГРЕКО не е ограничено само на земјите членки на Советот на Европа, секоја држава што учествувала во изработката на проширениот делумен договор може да се приклучи со известување за генералниот секретар на Советот на Европа. Дополнително, секоја држава што ќе стане членка на кривичните или граѓанските конвенции на Советот на Европа за корупција автоматски пристапува кон ГРЕКО и неговите процедури за оценување.
Со текот на годините, ГРЕКО го подобри капацитетот на своите членки за борба против корупцијата преку следење на нивната усогласеност со стандардите за антикорупција и помагајќи им да ги идентификуваат и да ги поправат недостатоците во националните антикорупциски политики. ГРЕКО поттикна законодавни, институционални и практични реформи во области како криминализација/санкционирање на корупциски престапи, транспарентност на политичкото финансирање и спречување на корупцијата меѓу парламентарците, судиите, обвинителите, највисоките извршни функции на централната власт и полицијата. Р.С.
