Кина најави дека ќе ги преземе „сите неопходни мерки“ за заштита на сопствените интереси како одговор на американските царини за челик и алуминиум кои стапија на сила денеска.
-Акцијата на САД сериозно ги крши прописите на Светската трговска организација и сериозно му штети на мултилатералниот трговски систем – рече Мао Нинг, портпаролка на кинеското Министерство за надворешни работи, на редовната прес-конференција.
Таа рече дека Пекинг ќе ги преземе сите неопходни мерки за да ги заштити своите легитимни права и интереси.
Зголемувањето на американските тарифи за челик и алуминиум стапи денеска во сила, што претставува нова етапа во трговската војна меѓу САД и нивните главни трговски партнери.
Американскиот претседател Доналд Трамп, чиј втор мандат во Белата куќа започна во јануари, веќе воведе царини за увоз на челик и алуминиум за време на неговиот прв мандат (2017-2021), но овие нови царини, како што рече Трамп кога ги објави на почетокот на февруари, се воведуваат без исклучоци или олеснувања.
Кина е најголемиот светски производител на челик, но не е главен снабдувач на САД.
Европската комисија веќе реагираше на американското воведување дополнителни царини за челик и алуминиум од 25 отсто, најавувајќи денеска дека од 1 април ќе применува „пропорционални“ царини за голем број американски производи.
