Изложбата „Уживање“ ќе биде отворена вечерва во МКЦ. Опсервацијата на ликовните дела во актуелната изложба „Уживање“ на двете млади академски ликовни авторки, Марта Патлиџанковска и Лусиана Ампева, е предизвик за нотирање нови енергии и продукции во ликовната сфера, но и задача за барање на онаа допирна точка, оној заеднички именител што ги поврзува како творци, а ги издвојува како индивидуи.
Во овој колаборативен проект, Ампева и Патлиџанковска преку своите дела се обидуваат да ја пренесат „магијата“, убавината на творечкиот занес во процесот на создавањето на едно дело, високото чувство на задоволство при проекцијата на мислата и материјализацијата на сликарската идеја на сликарското платно. Изложбата содржи дела работени во текот на 2024 година, големи формати, кои во ликовниот израз припаѓаат на реалистичката или фигуративната ликовна сфера, со примеси на одредена симболичност и асоцијативност.
Изложбата ќе биде отворена до 14 ноември во галеријата на МКЦ.
