Еден од најблиските соработници на претседателот на ФИФА, Џани Инфантино е мета на истражителите поради серија сомнителни плаќања
Верон Мосенго-Омба, генералниот секретар на Африканската фудбалска конфедерација (ЦАФ), е мета на истражителите поради серија сомнителни плаќања на сметки во швајцарската банка. Веста следи по ревизорскиот извештај на ЦАФ во кој се бара негово суспендирање, пренесуваат светските медиуми кои се повикуваат на порталот The Football Insider.
Швајцарскиот федерален кривичен суд соопшти дека Мосенго-Омба е под истрага поради сомневање за лошо управување, измама и фалсификување документи.
Споменатиот господин е еден од најблиските соработници на претседателот на ФИФА, Џани Инфантино. Истрагата беше официјално отворена на 20 февруари годинава, по истрага на Канцеларијата на Јавното обвинителство на кантонот Фрибург. Бројни извештаи за сомнителни трансакции на швајцарски сметки се испратени до Канцеларијата за известување за перење пари, објави The Football Insider.
Се тврди дека Мосенго-Омба во неколку наврати добивал бонуси пет пати повисоки од максимумот предвиден во неговиот договор за вработување со ЦАФ, а јавното обвинителство во Фрибург го пренасочувало случајот до Федералниот кривичен суд.
ЦАФ на почетокот на август потврди дека ги истражува наводите за корупција во рамките на својот секретаријат, при што шефот на одделот за управување, ризик и усогласеност на ЦАФ тврди дека Мосенго-Омба ги „попречувал“ членовите на одделот во нивните должности и повикал на негово суспендирање.
