Претседателката на Европската комисија, Урсула фон дер Лајен, сега ги подготвува мандатните писма за назначените комесари номинирани од земјите членки што ќе му се придружат на нејзиниот тим доколку ја поминат расправата во парламентот. Сепак, во бриселските кругови веќе се разговара за заслугите на овие кандидати, со оглед на потребата од експертиза во политиките на ЕУ во следните пет години
Составот на листата на еврокомесарите на тапет
Претседателката на Европската комисија, Урсула фон дер Лајен, се обидува да постави, според експертските коментари, „високи стандарди за нејзиниот втор мандат“, изјавувајќи за време на својот говор во Европскиот парламент во јули дека одлуките донесени во следните пет години ќе го одредат „местото на Европа во светот во следните 50 години“. Таа сега ги подготвува мандатните писма за назначените комесари номинирани од земјите членки што ќе му се придружат на нејзиниот тим доколку ја поминат расправата во парламентот. Сепак, во бриселските кругови, критичките објективи се насочени кон личности што „треба да се одликуваат со компетенции“, при што веќе се разговара за заслугите на овие кандидати, со оглед на потребата од експертиза во политиките на ЕУ во следните пет години.
– Овој пат писмата со мисијата ќе бидат опис на работното место што ќе треба да ги одразува компетенциите на кандидатите. Ќе биде потребен квалитет за да се соочиме со предизвиците на повеќе нивоа на глобално и внатрешно ниво – изјави инсајдер од Брисел со искуство од изборите во ЕУ за порталот „Еурактив“.
Економистите преовладуваат
Профилите на досега објавените кандидати во голема мера одговараат на „економските“ потреби на следната извршна власт на ЕУ, при што девет кандидати имаат искуство во областа на економијата.
Покрај тоа, седуммина се специјализирани за прашања од областа на животната средина, земјоделството и енергијата, како што се чешките, данските, холандските и шпанските кандидати, а четворица имаат експертиза во надворешната и безбедносната политика.
Покрај тоа, 14 кандидати – половина од групата – имаат политичко искуство во ЕУ, а четворица се смета дека имаат технократско потекло (Чешка, Франција, Португалија, Словенија) наместо повеќе политичко потекло.
„Тешкашите“ нема да ѝ ја олеснат работата на Фон дер Лајен
Во однос на политичките „тешкаши“, Фон дер Лајен би можела да се соочи со тешки разговори со Французинот Тиери Бретон, кој го доведе во прашање нејзиното водство веднаш откако беше избрана за главен кандидат на централнодесничарската ЕПП на изборите за ЕУ.
А, Унгарецот Оливер Вархеи нема да ѝ ја олесни работата, бидејќи тој ќе биде гласот на екстремно десничарскиот фронт „Патриоти за Европа“, политичкиот клуб на Фидес на Виктор Орбан и францускиот Национален собир.
Шпанката Тереза Рибера, која важи за „чуварка“ на Зелениот договор, исто така може да се покаже како сила што треба да биде земена в обзир. Доколку повторно се отвори досието на Зелениот договор, нејзината улога ќе биде клучна во постигнувањето на вистинската рамнотежа помеѓу „прагматичното“ спроведување на Фон дер Лајен и поамбициозниот пристап што го туркаат нејзиното социјалистичко семејство и зелените.
Последно, Чехот Јозеф Сикела веќе се судри со Фон дер Лајен околу предлогот за ограничување на цената во 2022 година и покажа решеност да преговара за време на претседателствувањето на неговата земја во услови на руската гасна криза.
Бугарија единствена го следеше советот на Фон дер Лајен
Бугарската влада предложи жена и маж како кандидати за нејзин еврокомесар – единствената земја што јавно го следеше советот на Урсула фон дер Лајен. Првата жена претседател на ЕК побара од владите на земјите членки да предложат двајца кандидати за таа да може да изгради родово балансиран тим.
Сепак, тоа не се случи со другите земји членки. Пред објавата на Бугарија, само шест жени беа номинирани да му се приклучат на тимот на Фон дер Лајен, во споредба со 17-те мажи (Италија и Белгија сè уште треба да номинираат кандидати).
Бугарија ја предложи Екатерина Захариева, министерка за надворешни работи во периодот меѓу 2017 и 2021 година и поранешна министерка за правда и за регионален развој, заедно со Јулијан Попов, кој до неодамна беше министер за животна средина и води. Тој е и поранешен политички советник за Централна и Источна Европа во Европската климатска фондација.
Бугарија би сакала Захариева да биде комесарка за регионална и кохезиона политика, што би ѝ овозможило надзор над Европскиот фонд за регионален развој, кој сочинува една третина од буџетот на ЕУ. На Попов, пак, се гледа како кандидат за бараното енергетско портфолио. Попов е попознат во западните кругови отколку во својата земја. Тој е член на Европската климатска фондација и истакнат активист за климата. Во 2016 година тој беше препознаен како еден од 40-те највлијателни гласа во европската енергетска политика според истражувањето „Јурофактори 40“. Р.С.
Захариева се смета за избор со висок степен на веројатност
Захариева се смета за најверојатниот избор на Фон дер Лајен, најмногу поради тоа што е жена и би ја направила поставата на Комисијата поприфатлива за Европскиот парламент, пренесува „Еурактив“.
Најголемата бугарска партија, ГЕРБ (ЕПП), ја номинира Захариева, која речиси сигурно ќе биде официјално именувана од преодната влада на премиерот Димитар Главчев, поранешен пратеник од партијата.
Слаба точка на Захариева може да биде нејзината блиска врска со ВМРО-БНД, екстремно десничарската партија што беше коалициски партнер на ГЕРБ за време на нејзиниот мандат како министерка за надворешни работи. Според „свиркачката“ Катја Матева, Захариева знаела за измама организирана од ВМРО-БНД за нелегална продажба на бугарски пасоши на странци. „Таа никогаш не го оспорила тврдењето“, потврди Матева.
Додека беше вицепремиерка и шефица на бугарската дипломатија, Захариева во повеќе наврати ја негираше посебноста на македонскиот јазик, а се залагаше и за чествување заедничка историја помеѓу Македонија и Бугарија.
Бугарија има претходно одбиени кандидати за еврокомесар. Поранешната министерка за надворешни работи Румјана Желева беше одбиена од Европскиот парламент во 2010 година. Бугарија не само што е единствена во номинирањето двајца кандидати туку е единствената земја од ЕУ што никогаш немала комесар маж.
