Македонската радио-телевизија по одржаната аудиција ги избра Ана Ванчевска и Алексеј Ивановски за македонски претставници на годинашниот „Јуниорски евросонг“, кој ќе се одржи на 16 ноември, во Мадрид, Шпанија.
Ана Ванчевска, родена на 3 мај 2010 година во Битола, е извонредно талентирана млада пејачка, која веќе се прослави со учество и освоени први места на голем број музички фестивали. Нејзиниот моќен глас и неверојатни изведби ги воодушевуваат публиката и судиите, прикажувајќи ветувачка иднина во музичката индустрија. Посветеноста и природниот талент на Ана ја прават извонреден изведувач и инспиративен млад уметник.
Таа годинава беше избрана за единствена претставничка на Македонија на престижниот меѓународен фестивал „Сан Ремо јуниор“ во Италија. Покрај музичкиот успех, Ана е посветена ученичка и добитничка на голем број државни награди по математика, физика и француски јазик и е вклучена во реализација на многу проекти.
Алексеј Ивановски, роден на 7 декември 2011 година во Битола, е исклучително талентиран млад пејач што учествувал и победил на голем број музички фестивали. Неговиот волшебен глас и импресивно сценско присуство го издвојуваат, правејќи го истакнат изведувач со светла иднина во музичката индустрија.
Алексеј е активен на голем број општински, регионални и државни натпревари по предметите Математика, Англиски јазик и Француски јазик, од каде што има освоено голем број први места. Сака да плива, да шета во природа и да се дружи. Тој многу ги сака животните и дел од своето време посветува на грижата за нив.
Ана и Алексеј со својот извонреден талент и хармонични гласови им го привлекуваат вниманието на љубителите на музиката насекаде. И покрај нивната возраст, имаат неверојатни гласовни способности, кои никого не оставаат рамнодушен.
Фото: МРТ – „Јуниорски евросонг 2024“
