Основното јавно обвинителство Скопје донело наредба за спроведување истражна постапка против две лица за кои постои основано сомнение дека извршиле дејствија на кривично дело „грабнување“.
– Тие на 3 март заедно учествувале во дејствија на грабнување на едно лице во Кисела Вода. Осомничените, на возраст од 30 и 25 години, претходно по предлог на Обвинителството, а со решение на Судот беа задржани во краткотраен притвор во траење од два пати по 48 часа со цел обезбедување докази – информираат од Јавното обвинителство.
Од ЈО посочуваат дека постојат околности што укажуваат на опасност од бегство, особени околности кои го оправдуваат стравот дека осомничените ќе се обидат да ги скријат или уништат трагите на кривичното дело, ќе влијаат врз сведоците или ќе го повторат делото, јавниот обвинител до судијата на претходна постапка од Основниот кривичен суд Скопје сега доставил предлог за определување мерка притвор за двајцата осомничени.
Министерот за внатрешни работи Оливер Спасовски потврди дека скопската полиција презема мерки и постапува по случајот со исчезнатиот 26-годишник Самоил Костадиновски за кого медиуми објавија дека е внук на политичарот и лидер на Обединети за Македонија, Љубе Бошкоски. Трагата на грабнатиот му се губи на 4 март кај амбасадата на Чешка, а неговото исчезнување го пријавил неговиот брат. Случајот го потврди и Министерството за внатрешни работи во дневниот билтен од 6 март.
