За еден час во денешната акциска контрола во Охрид биле изречени 60 санкции, пред се’ за пречекорена брзина, за нерегистрирани возила и возење без возачка дозвола, истакна портпаролот на МВР Тони Ангеловски во Охрид.
– Се санкционираат сите сообраќајни прекршоци, а особено оние кои што се најчеста причина за сообраќајни незгоди со тешки последици, како што се управувањето на возило под дејство на алкохол, возење со брзина над дозволената, а се санкционираат и возачите на мотори кои не ги почитуваат правилата – рече Ангеловски.
Портпаролот на МВР апелираше до граѓаните на Охрид да ги почитуваат сообраќајните правила и прописи за да се зголеми безбедноста во сообраќајот. Тој потенцира дека акциските контроли продолжуваат и во наредните денови, а целосните податоци од денешната засилена акциска контрола во Охрид ќе бидат презентирани утре.
